Esdras 5 - Biblia SEPT

Construción da casa de Deus

¹ Entón, o profeta Axeo e o profeta Zacarías, fillo de Idó, comezaron a profetizar ós xudeus de Xudá e Xerusalén no nome do Deus de Israel, que co seu espírito os invadía.

² Zerubabel fillo de Xealtiel e Xosué fillo de Iosadac puxéronse en pé e empezaron a construír o templo de Xerusalén; con eles estaban os profetas de Deus que os alentaban.

³ Mais Taznai, sátrapa da outra banda do río, Xetar—Boznai e os seus colegas, viñeron onda eles e dixéronlles: —"Quen vos deu a orde de levantar este templo e armar ese madeirame?

⁴ Como se chaman os homes responsables desta construción?"

⁵ Pero Deus ollaba sobre os anciáns de Xudá: non se lles impediu o traballo ata que o asunto chegase a Darío e mandase a acta oficial o antes posible.

⁶ Copia da carta enviada ó rei Darío polo gobernador da outra banda do río, Taznai, Xetar—Boznai e os seus colegas, as xentes de Arfaxac na outra banda do río.

⁷ Enviáronlle unha mensaxe na que estaba escrito: —"O rei Darío, enteira paz.

⁸ Que o rei saiba que fomos á provincia de Xudá, ó templo do gran Deus, que están construíndo con pedras talladas e colocando madeira nos muros. Este traballo faise con moito esmero e prospera entre as súas mans.

⁹ Entón preguntamos ós anciáns e dixémoslles: Quen vos deu a orde de construír este templo e armar ese madeirame?

¹⁰ Preguntámoslles ademais polos nomes dos responsables para darchos a coñecer.

¹¹ Velaquí a resposta que nos chegou: Nós somos os servidores do Deus dos ceos e da terra, e reconstruímos o templo que xa se construíra hai longos anos, o que un gran rei en Israel levantara e completara.

¹² Mais porque os nosos pais irritaron ó Señor dos ceos, entregounos nas mans do caldeo Nabucodonosor, rei de Babilonia, que destruíu este templo e deportou o pobo a Babilonia.

¹³ Con todo, no seu primeiro ano, Ciro, rei de Babilonia, deu a orde de volver levantar esta casa de Deus.

¹⁴ Ademais, os obxectos da casa de Deus, de ouro e prata, que Nabucodonosor fixera levar do templo de Xerusalén ó templo de Babilonia, o rei Ciro mandounos quitar de alí e confiarllos a Xexbasar, ó que el puxera de gobernador.

¹⁵ Díxolle: Colle eses obxectos e lévaos ó templo de Xerusalén, e que a casa de Deus sexa reconstruída sobre os seus mesmos cimentos.

¹⁶ Entón ese Xexbasar veu poñer os cimentos do templo de Deus en Xerusalén. Desde ese momento ata agora, séguese construíndo, mais aínda non está rematada.

¹⁷ Polo tanto, se lle prace ó rei, que se inquira nos arquivos reais de Babilonia, a ver se houbo unha orde dada polo rei Ciro para que se construíse esta casa de Deus en Xerusalén, e que se nos envíe a decisión do rei sobre o caso".