Esdras 10 - Biblia SEPT

Expulsión das mulleres estranxeiras

¹ Mentres Esdras, chorando e prostrado diante do templo de Deus, rezaba e facía esta confesión, unha multitude moi grande de israelitas —homes, mulleres e nenos— foise xuntando a el, chorando sen parar.

² Entón Xecanías fillo de Iehiel, un dos fillos de Elam, tomou a palabra e díxolle a Esdras: —"Fomos infieis ó noso Deus, tomando mulleres estranxeiras dos pobos pagáns. Mais isto aínda pode ter remedio para Israel:

³ fagamos agora unha alianza co noso Deus, comprometéndonos a despedir as mulleres estranxeiras xunto cos fillos que delas tivemos, de acordo co que o señor di e segundo o consello de todos os que temen o mandato do noso Deus. Que se faga segundo a Lei.

⁴ Ponte en pé, que isto é cousa túa; nós estamos ó teu lado. Animo e mans á obra".

⁵ Entón Esdras levantouse e fixo xurar ós xefes dos sacerdotes, dos levitas e de todo Israel, que se faría como dixese. E xurárono.

⁶ Entón Esdras levantouse de onde estaba, cara á casa de Deus, e dirixiuse ó apousento de Iehohanán fillo de Eliaxib. Unha vez chegado, non comeu nin bebeu nada, en sinal de dó, magoado pola infidelidade dos deportados.

⁷ Fixo publicar unha proclama en Xudá e Xerusalén, a fin de que todos os deportados se xuntasen en Xerusalén.

⁸ O que non acudise no prazo de tres días, tempo establecido polas autoridades e senadores, seríanlle confiscados os bens e el excluído da comunidade dos repatriados.

⁹ Entón todos os homes de Xudá e de Benxamín xuntáronse en Xerusalén o terceiro día; era o vinte do noveno mes. Todo o pobo ficaba na praza do templo, tremendo por culpa dese asunto e pola moita chuvia.

¹⁰ O sacerdote Esdras levantouse e díxolles: —"Fixestes moi mal casando con mulleres estranxeiras, crecendo por ese camiño a culpabilidade de Israel.

¹¹ Agora, pois, confesádevos ó Señor, o Deus dos vosos pais, e facede a súa vontade: afastádevos dos pobos pagáns e das mulleres estranxeiras".

¹² Toda a asemblea respondeu con forte voz: —"É verdade. Débese facer coma ti dis.

¹³ Pero o pobo é numeroso e estamos na estación das chuvias. Non se pode seguir fóra. Ademais, non é cousa dun día nin de dous, pois somos moitos os que quebrantamos ese mandamento.

¹⁴ Que os nosos xefes volvan aquí no nome de toda a asemblea e que todos cantos nas nosas vilas tomaron mulleres estranxeiras veñan no tempo fixado cos anciáns de cada vila xunto cos seus xuíces, ata que a cólera do noso Deus, acesa por este motivo, se aparte de nós".

¹⁵ Non obstante, Ionatán fillo de Asahel e Iahzías fillo de Ticrah opuxéronse, apoiados por Mexulam e polo levita Xabtai.

¹⁶ Mais os deportados fixeron como se lles dixera. O sacerdote Esdras escolleu a algúns dos cabezas de familia, segundo as súas liñaxes, designándoos polos seus nomes.

¹⁷ E o un do primeiro mes remataron o asunto de todos os homes que casaran con estranxeiras.

Lista dos culpables

¹⁸ Entre os fillos dos sacerdotes que tomaran mulleres estranxeiras, atopáronse: Entre os fillos de Xosué fillo de Iosadac e seus irmáns: Maseías, Eliézer, Iarib e Guedalías;

¹⁹ comprometéronse a despedir as súas mulleres e ofrecer un carneiro para repararen a ofensa;

²⁰ entre os fillos de Imer: Henaní e Zabadías;

²¹ entre os fillos de Harim: Maseías, Elías, Xemaías, Iehiel e Ozías;

²² entre os fillos de Paxhur: Elioenai, Ismael, Netanel, Iozabad e Eleasah.

²³ Entre os levitas: Iozabad, Ximí, Quelaías —o quelita—, Petahías, Yehudah e Eliézer.

²⁴ Entre os cantores: Eliaxib. Entre os porteiros: Xalum, Télem e Urí.

²⁵ Referente ós israelitas: entre os fillos de Parox: Ramíah, Izías, Malaquías, Miiamín, Elazar, Malaquías e Benaías.

²⁶ Entre os fillos de Elam: Matanías, Zacarías, Iehiel, Abdi, Ieremot e Elías;

²⁷ entre os fillos de Zatú: Elioenai, Eliaxib, Matanías, Ieremot, Zabad e Azizá;

²⁸ entre os fillos de Bebai: Iehohanán, Hananías, Zabai, Atlai;

²⁹ entre os fillos de Baní: Mexulam, Maluc, Adaías, Iaxub, Xeal, Ieremot;

³⁰ entre os fillos de Pahat—Moab: Adná, Kelal, Benaías, Maseías, Matanías, Besalel, Binuí, Menaxés;

³¹ entre os fillos de Harim: Eliézer, Ixías, Malaquías, Xemaías, Simeón,

³² Benxamín, Maluc, Memarías;

³³ entre os fillos de Haxum: Matenai, Matatah, Zabad, Elifélet, Ieremai, Menaxés, Ximí;

³⁴ entre os fillos de Baní: Madai, Amram, Uel,

³⁵ Benaías, Bedía, Keluí,

³⁶ Vanías, Meremot, Eliaxib,

³⁷ Matanías, Matenai e Iasai;

³⁸ Baní e Binui, Ximí,

³⁹ Xelemías, Natán, Adaías,

⁴⁰ Macnadbai, Xaxai, Xarai,

⁴¹ Azarel, Xelemías, Xemaría,

⁴² Xalum, Amarías, Xosé;

⁴³ entre os fillos de Nebó: Iehiel, Matatías, Zabad, Zebiná, Iadai, Ioel, Benaías.

⁴⁴ Todos eses tomaran mulleres estranxeiras; e mesmo entre eles había mulleres das que xa tiveran fillos.