Efesios 3 - Biblia SEPT

A misión de Paulo

¹ Por esa razón eu, Paulo, preso por mor de Cristo Xesús e por vos levar este ben a vós, os xentís...

² Coido que oístes falar da encomenda que a graza de Deus me fixo en favor voso:

³ xa que por medio dunha revelación se me deu a coñecer o misterio, tal como escribín antes en poucas palabras;

⁴ polo que, ó lelo, podedes esculcar como entendo eu o misterio de Cristo,

⁵ que noutras xeracións non se lle dera a coñecer á humanidade como agora llelo manifesta o Espírito ós seus santos apóstolos e profetas:

⁶ que os xentís son parceiros, membros do mesmo corpo e copartícipes da promesa en Cristo Xesús polo Evanxeo

⁷ do que me fixo servidor a xenerosa graza que Deus me concedeu coa eficacia do seu poder.

⁸ A min, o máis cativo de todos os crentes, concedéuseme o honor de anunciarlles ós xentís a inimaxinable riqueza de Cristo

⁹ e amosarlles a todos a realización do misterio escondido desde sempre en Deus, que creou todas as cousas.

¹⁰ Así desde o ceo e por medio da Igrexa dáselles a coñecer a principados e autoridades a variedade de formas da sabedoría de Deus,

¹¹ contidas no proxecto eterno que se levou a cabo por medio de Cristo Xesús, noso Señor.

¹² Grazas a El temos a liberdade de acceso confiado, pola fe nel.

¹³ Por isto pídovos que non vos desmoralicedes polas tribulacións que paso por causa vosa, que precisamente elas son a vosa gloria.

Grandeza do amor de Cristo

¹⁴ Por esta razón axeónllome perante o Pai,

¹⁵ de quen toma nome toda paternidade no ceo e mais na terra,

¹⁶ para que vos conceda segundo a riqueza da súa gloria, que se robusteza poderosamente en vós o home interior por medio do seu Espírito;

¹⁷ que Cristo habite pola fe nos vosos corazóns e que teñades a vosa raíz e o voso alicerce no amor,

¹⁸ de xeito que poidades comprender, con todo o pobo crente, o ancho, o longo, o alto e o profundo que é

¹⁹ o amor de Cristo, que supera todo coñecemento; e así quededes cheos da plenitude total, que é Deus.

Doxoloxía

²⁰ A aquel que, con esa potencia que actúa en nós, pode facer moito máis inmensamente máis do que nós poidamos pedir ou imaxinar,

²¹ A El a gloria na Igrexa e en Cristo Xesús, por todas as xeracións de séculos de séculos. Amén.