Deuteronomio 6 - Biblia SEPT

Respectarás e amarás o Señor, cumprindo os seus mandamentos, preceptos e ordes

¹ Estes son os mandamentos, os preceptos e as ordes que o Señor, voso Deus, mandou ensinarvos, para que os puxésedes en práctica no país ao que ides pasar, para collelo en posesión;

² de xeito que respectes o Señor, o teu Deus, gardando todos os seus preceptos e os seus mandamentos que eu che ordenei, ti e o teu fillo e mais o teu neto, todos os días da túa vida, para que se alonguen os teus días.

³ Escoita, Israel, e ten coidado de o practicar, para que sexas feliz e que te multipliques moito, pois tal como cho falou o Señor, Deus dos teus pais, é unha terra que deita leite e mel.

⁴ Escoita, Israel: O Señor, o noso Deus, é Iavé, o único.

⁵ Amarás o Señor, o teu Deus, con todo o teu corazón, con todas as túas aspiracións e con toda a túa forza.

⁶ Os preceptos estes, que eu che mando hoxe, estarán no teu corazón;

⁷ inculcarásllelos ós teus fillos e falarás deles estando na túa casa e indo polo teu camiño, estando deitado e estando de pé:

⁸ Ataralos á túa man coma sinal, e servirán de adorno entre os teus ollos,

⁹ escribiralos nos marcos da túa casa e nas túas portas.

¹⁰ Cando o Señor, o teu Deus, te faga entrar no país que xurara a teus pais Abraham, Isaac e Xacob, que cho daría a ti, con cidades grandes e fermosas que ti non construíches,

¹¹ con casas cheas de toda clase de riquezas que ti non acumulaches, con pozos escavados que ti non cavaches, con viñas e campos de oliveiras que ti non plantaches: cando ti comas e te fartes,

¹² ten moito coidado de non te esqueceres do Señor que te sacou do país de Exipto, da situación de escravitude.

¹³ O Señor, o teu Deus, has de respectar, a El has de adorar; e has de facer o xuramento, invocando o seu nome.

¹⁴ Non vos vaiades tras doutros deuses, deuses dos pobos que vos rodean,

¹⁵ porque no medio de ti está un Deus celoso, o Señor, o teu Deus: non sexa que se desafogue contra ti a ira do Señor o teu Deus e te faga desaparecer de sobre a superficie da terra.

¹⁶ Non tentedes o Señor, voso Deus, tal como o tentastes no lugar de Tentación.

¹⁷ Gardade fielmente os mandamentos do Señor, voso Deus, as súas normas e os seus preceptos, os que El vos deu.

¹⁸ Fai o que é correcto e honrado ós ollos do Señor. Así atoparás a felicidade e chegarás a coller posesión do bo país, que o Señor lles prometeu con xuramento ós teus pais,

¹⁹ botando da túa presenza a todos os teus inimigos, tal como o dixo o Señor.

Catequese familiar: teoloxía dos mandamentos deducida da Pascua e da Alianza

²⁰ Velaí que mañá o teu fillo che preguntará deste xeito: Que son estas normas, estes preceptos e estes decretos que o Señor, o noso Deus, vos mandou a vós?

²¹ Ti responderaslle a teu fillo: Eramos escravos do Faraón en Exipto, pero o Señor sacounos de Exipto con man forte.

²² O Señor puxo diante dos nosos ollos en Exipto grandes e terribles sinais e prodixios contra o faraón e contra toda a súa corte.

²³ Pero a nosoutros sacounos de alí co fin de nos ir guiando, ata darnos a terra que lles prometera baixo xuramento a nosos pais.

²⁴ Entón o Señor mandounos pór en práctica todos estes preceptos, respectando así ao Señor o noso Deus, para sermos sempre felices e para podermos vivir coma hoxe.

²⁵ A nosa xustiza consistirá en que coidemos de pór en obra todos estes mandamentos ante a presenza do Señor, o noso Deus, tal e como El nolo mandou.