Colosenses 3 - Biblia SEPT

¹ Polo tanto, se resucitastes con Cristo, buscade as cousas de alá enriba, onde Cristo está sentado á dereita de Deus;

² Arelade o de arriba e non o da terra.

³ Vós morrestes e a vosa vida está agachada con Cristo en Deus.

⁴ Cando se manifeste Cristo, que é a vosa vida, daquela tamén vós vos manifestades con El revestidos de claridade.

⁵ Así que, dádelle morte a todo canto tedes de terreal: a fornicación, a inmoralidade, a paixón, os malos desexos e a cobiza, que é unha idolatría.

⁶ Estas son as cousas polas que o noxo de Deus cae sobre os fillos rebeldes;

⁷ e nelas andastes vós en tempos cando viviades emporcallados nelas.

⁸ Pero agora deixádevos de todo iso: furor, carraxe, ruindade, aldraxes e palabras groseiras, lonxe dos vosos beizos.

⁹ Non mintades uns a outros, xa que vos espistes do home vello cos seus malos feitos

¹⁰ e vos revestistes do home novo, que se vai anovando, conforme a imaxe de quen o creou, para chegar a un coñecemento total.

¹¹ Alí xa non hai máis nin grego nin xudeu, circuncisión nin non circuncisión, estranxeiro nin bárbaro, escravo nin libre, senón que Cristo é todo en todos.

¹² Vós, logo, coma elixidos de Deus, santos e benqueridos, revestídevos de sentimentos de misericordia, de bondade, de humildade, de sinxeleza, de tolerancia.

¹³ Aturádevos uns ós outros e perdoádevos, cando un teña queixa doutro; coma o Señor vos perdoou, perdoádevos tamén vós.

¹⁴ E, por riba de todo isto, cinguídevos co amor, que é o lazo que todo o une e leva a perfección.

¹⁵ Que a paz de Cristo goberne os vosos corazóns, xa que a ela vos chamaron coma membros dun mesmo corpo. Sede tamén agradecidos.

¹⁶ Que a palabra de Cristo habite en vós con toda a súa riqueza. Ensinádevos e alentádevos uns a outros o mellor que saibades. Co corazón cheo de agradecemento cantádelle a Deus salmos, himnos e cántigas inspiradas.

¹⁷ E todo canto fagades, de palabra ou de obra, facédeo para honra de Xesús, o Señor, dándolle grazas a Deus Pai por medio del.

Preceptos concretos

¹⁸ Mulleres, sede dóciles ós vosos homes coma lle acae a unha muller cristiá.

¹⁹ Homes, amade as vosas mulleres e non sexades ríspetos con elas.

²⁰ Fillos, sede ben guiados en todo cos vosos pais, que isto é cousa agradable ó Señor.

²¹ Pais non asoballedes os vosos fillos, para que non saian coitados.

²² Escravos, obedecede en todo ós amos que tedes na terra, non para buscar o contento dos homes que ven o voso servizo, senón de corazón por respecto ó Señor.

²³ Todo canto fagades, facédeo con toda a alma, como para o Señor e non para os homes,

²⁴ tendo en conta que recibiredes do Señor a herdade coma recompensa. Servide a Cristo, o voso Señor.

²⁵ Quen cometa inxustiza, recibirá o merecido pola súa inxustiza, que Deus non anda con favoritismos.