Cantares 3 - Biblia SEPT

Fantasías

¹ —Sobre o leito, de noite, busquei a quen ben quería. Busqueino e non o atopei.

² Heime erguer e roldar a vila, polas rúas, polas prazas, buscar hei a quen ben quería! Busqueino e non o atopei!

³ Encontráronme a min os gardas, os que roldan a vila: —"Vistes a quen ben quería?"

⁴ Apenas eu os deixara e encontrei a quen ben quería; aferrei nel, non o ceibo, ata o meter na casa de miña nai, na cámara da que me xerou.

⁵ Conxúrovos, meniñas de Xerusalén, polas gacelas ou cervas montesías, non espertedes nin desveledes o amor ata que el queira!

Cortexo de príncipes

⁶ Que é aquilo que sobe da estepa coma columnas de fume, recendendo a mirra e mais a incenso e a canta especia teña o mercador?

⁷ É a liteira de Salomón! Sesenta homes garridos a rodean de entre os cabaleiros de Israel;

⁸ todos eles levan a man na espada, veteranos de loitas; portan cadansúa espada xunto á coxa contra as alarmas da noite.

O trono de Salomón

⁹ Fíxose o rei Salomón un palanquín de madeiras do Líbano.

¹⁰ De prata fixo as columnas, e o seu respaldo é de ouro; de púrpura o asento, incrustado en almafí

Coral

¹¹ Meniñas de Xerusalén, saíde! Vinde ver, nenas de Sión, o rei Salomón coa coroa con que súa nai o coroou no día das súas vodas, día de folgar de corazón!