Amós 5 - Biblia SEPT

¹ Escoitade esta palabra, este pranto que eu entoo contra vós, casal de Israel:

² Caeu, non rexurdirá, a doncela de Israel, tirada polo seu propio chan, non haberá quen a erga;

³ pois así di o Señor Iavé: "Vila que recrutou un milleiro, recupera cen, e a que recrutou cen, recupera dez";

⁴ pois así di Iavé ó casal de Israel: "Buscádeme e viviredes".

⁵ Non busquedes a Betel, non vaiades a Guilgal, non vos acheguedes a Beerxeba, pois Guilgal ha de ir deportada e Betel quedará en nada.

⁶ Procurade a Iavé e viviredes, non vaia dar o lume no casal de Xosé e o engulipe e ninguén o apague por causa de Betel.

⁷ Ai dos que trocan o dereito en asentes e botan polo chan a xustiza!

⁸ Foi El quen fixo as Pléiadas e o Orión, quen muda as tebras en abrente e escurece o día en noite, quen convoca as augas do mar e as verte sobre a superficie da terra: Iavé é o seu nome.

⁹ Quen dispón a desfeita contra o forte, chegando o saqueo ata a cidadela.

¹⁰ Odian ó fiscal no tribunal, rexeitan a quen dá testemuño cumprido,

¹¹ por iso: Xa que esmagades os foros do pobre e lle esixides tributos de trigo, se construístes pazos de perpiaño non os habitaredes, se plantastes viñas farturentas non beberedes do seu viño.

¹² Ben sei eu dos vosos innumerables delitos e dos vosos enormes pecados, asoballades o honrado, aceptades de suborno que torcedes o dereito do pobre no tribunal.

¹³ Por iso o asisado cala neste tempo pois é un tempo cativo.

¹⁴ Buscade o ben e non o mal de xeito que vivades e Iavé, o Deus dos Exércitos, quedará convosco, segundo dicides.

¹⁵ Rexeitade o mal, amade o ben, que impere o dereito nos tribunais; quizais se considere, Iavé, Deus dos Exércitos, do resto de Xosé.

¹⁶ Por iso así di Iavé, Deus dos Exércitos, o Señor: "En todas as prazas, loito, en todas as rúas berran: Ai, ai! Chaman ó xornaleiro para o laio e para o pranto ás carpideiras

¹⁷ e en todas as viñas haberá loito cando eu pase por medio de ti": dixo Iavé.

¹⁸ Ai daqueles que devecen polo día de Iavé! Que vai significar para vós o día de Iavé? Vai ser tebra; non vai ser luz.

¹⁹ Vai ser coma cando foxe un do león e vai dar co oso; logra aínda chegar á casa, apoia a man na parede, e mórdeo a cóbrega.

²⁰ Non vai ser acaso tebra o día de Iavé e non luz? Abofé que o seu é a escuridade e non a claridade!

²¹ "Aborrezo e rexeito as vosas festas, non soporto o cheiro das vosas liturxias

²² (se non é cando me ofrendades holocaustos) as vosas oblacións non me alegran, o banquete sacrificial dos vosos xatos nin o vexo.

²³ Arreda de min a charanga dos teus cantos! Non estou para escoitar músicas das túas arpas.

²⁴ O dereito é o que ten que fluír coma auga e a xustiza coma manancial perenne.

²⁵ Acaso ofrecestes sacrificios e ofrendas no deserto durante os corenta anos, casal de Israel?

²⁶ Levabades daquela a Sicut o voso rei e a Kiiún, imaxes vosas, a estrela dos vosos deuses, fabricados por vós mesmos?

²⁷ Eu si, eu vouvos levar deportados alén de Damasco", dixo Iavé, que ten por nome Deus dos Exércitos.