Amós 4 - Biblia SEPT

¹ Escoitade esta palabra, vacas de Baxán que morades sobre o monte de Samaría, as que asoballades os necesitados, as que esfolades os pobres, mentres lles dicides ós vosos maridos: "Botádenos de beber!"

² Xurou o Señor Iavé pola súa santidade: "Havos chegar o tempo no que vos arrastren con adivais e o resto de vós con garfos.

³ Teredes que saír polas gretas tirando cara adiante, para serdes levadas ás partes do Hermón, —Oráculo de Iavé—.

⁴ Ide en romaría a Betel para pecar, ou a Guilgal, e amoreade delitos; levade de mañá os sacrificios e ó día terceiro os vosos décimos.

⁵ Queimade parte do levedado en acción de grazas, anunciade ben alto as ofrendas voluntarias xa que así vos peta, israelitas, —Oráculo do Señor Iavé—.

⁶ Eu, da miña banda, déravos dentes limpos en todas as vosas vilas e carencia de pan en todos os vosos casais, mais non volvestes a min —Oráculo de Iavé—.

⁷ Denegueivos a chuvia cando faltaban aínda tres meses para a colleita, fixen que chovese nunha vila si e noutra non; unha leira foi regada e outra, onde non choveu, murchou.

⁸ Dúas vilas e ata tres foron a tombos ata a veciña por beber auga, mais non se deron saciado e aínda así non volvestes a min —Oráculo de Iavé—.

⁹ Ferinvos co caruncho e coa mera , mandei a seca ós vosos hortos e viñas; as vosas figueiras e oliveiras comeunas o saltón, mais non volvestes a min —Oráculo de Iavé—.

¹⁰ Mandei sobre vós unha peste semellante á de Exipto, pasei pola espada os vosos mozos ó tempo que capturaban os vosos cabalos, fixen subir ós vosos narices o fedor do campamento, mais non volvestes a min —Oráculo de Iavé—.

¹¹ Derrubeivos coma derrubara Deus a Sodoma e Gomorra e quedastes coma muxica saída dun incendio, mais non volvestes a min —Oráculo de Iavé—.

¹² Por iso voute tratar deste xeito, Israel; e porque te vou tratar así aparéllate para o encontro co teu Deus".

¹³ Pois olla: Quen moldeou os montes e creou o vento, quen lle descobre ó home o que está a matinar, quen fai o abrente e mais as tebras, quen camiña sobre os lombos da terra, Iavé, Deus dos Exércitos, é o seu nome.