2 Timoteo 3 - Biblia SEPT

Os homes dos tempos derradeiros

¹ Ten ben sabido isto: que nos días derradeiros haberá intres difíciles.

² A xente volverase egoísta, avariciosa, fachendosa, presumida, maldicente, mal guiada cos seus pais, sen caridade, impía,

³ desamorada, falsa, calumniadora, arrogante, ríspeta, inimiga do bo,

⁴ traicioneira, temeraria, foncha, máis amante do pracer ca de Deus;

⁵ terá aparencia de piedade, pero renegará da verdadeira forza da mesma. Ti con xente desa non te xuntes.

⁶ Porque destes son os que se meten nas casas e engaiolan as mulleriñas ateigadas de pecados e empurradas por moitas castes de paixóns,

⁷ que están sempre aprendendo pero que non dan chegado ó coñecemento da verdade.

⁸ E da mesma maneira que Ianne e Iambrés se arrepuxeron contra Moisés, así tamén estes se arrepoñen contra verdade: homes de mente estragada, réprobos na fe.

⁹ Pero non avantarán moito, porque a súa insensatez será manifesta a todos, como o foi a daqueles.

Tarefa dura de Timoteo

¹⁰ Ti, en troques, seguíchesme a min na doutrina, no xeito de vida, nos meus plans, na fe, na paciencia, na caridade, na resistencia

¹¹ ás persecucións e ós sufrimentos (como os que aturei en Antioquía, en Iconio, en Listra). Que grandes persecucións soportei e de todas me librou o Señor!

¹² E tódolos que queiran vivir coma bos cristiáns padecerán persecución.

¹³ Homes ruíns e sedutores irán de mal en peor, enganadores e enganados.

¹⁴ Ti mantente no que aprendiches e no que criches, e que non che esqueza quen cho aprendeu.

¹⁵ Porque xa desde neno coñeces as letras santas, que son podentes para che facer saber o camiño da salvación pola fe en Cristo Xesús.

¹⁶ Toda a Escritura está inspirada por Deus e é útil para ensinar, para corrixir, para emendar, para educar na xustiza.

¹⁷ Dese xeito, o home de Deus tórnase perfecto e competente para toda obra boa.