2 Samuel 23 - Biblia SEPT

¹ Estas son as derradeiras palabras de David: —"Oráculo de David, fillo de Ixaí, oráculo do home encomiado, do unxido do Deus de Xacob, do modulador das cántigas de Israel.

² O espírito do Señor fala por min, a súa palabra está na miña lingua.

³ O Deus de Israel faloume, a rocha de Israel díxome: O que goberna os homes con xustiza o que goberna co temor de Deus,

⁴ é coma a luz da mañá, ó nacer o sol, coma a mañá limpa de néboa, cando, despois da choiva, brilla o céspede na terra.

⁵ Non é así coa miña casa, na presenza de Deus? Xa que El fixo comigo un pacto eterno, ben ordenado e gardado, non me dará El a vitoria e fará florecer as miñas arelas?

⁶ Mais os perversos son coma cardos que se tiran e que ninguén colle coa súa man.

⁷ Cando alguén se lles achega, vai armado de ferro ou pau de lanza para botalos no lume e que se queimen".

Heroes de David

⁸ Estes son os nomes dos heroes de David: Ixbaal o hacmonita, o primeiro dos tres, que brandiu a machada e matou oitocentos homes nun combate.

⁹ Despois del, Elazar, fillo de Dodó o ahohita, un dos tres heroes que estaban con David, cando desafiaron ós filisteos que se reuniran alí para o combate. Cando os de Israel se retiraban,

¹⁰ foi el e matou filisteos ata que a man se lle cansou e lle quedou o puño apegado a espada. Aquel día concedeulle o Señor unha gran vitoria a Israel. O exército volveu onda Elazar, só para coller os despoxos.

¹¹ Seguíalle Xamá, fillo de Agué, de Harar. Concentrándose os filisteos en Lehí, onde había un agro todo sementado de lentellas, o exército israelita fuxiu de diante deles.

¹² Entón chantouse Xamá no medio do agro, defendeuno e combateu ós filisteos. Foi unha grande vitoria que o Señor lle concedeu.

¹³ O comezo da seitura, tres dos trinta baixaron onda David á cova de Adulam, ó tempo que un corpo de filisteos acampaba no val de Refaím.

¹⁴ David atopábase, daquela, no refuxio, mentres unha unidade de filisteos estaba destacada en Belén.

¹⁵ David sentiu sede e dixo: —"Quen me dera auga do pozo que hai onda a porta de Belén!"

¹⁶ De contado os tres heroes irromperon no campamento filisteo, foron coller auga do pozo que hai onda a porta de Belén e leváronlla a David. David non a quixo beber, senón que a verteu en libación ó Señor.

¹⁷ Dixo: —"Lonxe de min, Señor, facer tal cousa! É o sangue dos homes que expuxeron as súas vidas". E non quixo bebela. Iso foi obra dos tres heroes.

¹⁸ Abixai, irmán de Ioab, fillo de Seruiah, era o xefe dos trinta. Brandindo a súa lanza contra trescentos homes, gañou un nome entre os trinta.

¹⁹ Era o de máis sona entre os trinta, que o fixeron o seu xefe. Pero non se igualou ós tres.

²⁰ Benaías, fillo de Iehoiadá, de Cabseel, home valente, autor de grandes fazañas, foi quen matou a dous moabitas, fillos de Ariel, e quen un día de neve entrou na tobeira dun león e matouno alí.

²¹ Foi tamén el quen matou a un exipcio moi forzudo e que tiña unha lanza na man. Benaías acercouse a el cun caxato, ripoulle a lanza da man e matouno con ela.

²² Estas cousas fíxoas Benaías, fillo de Iehoiadá, que se labrou un nome entre os trinta campións.

²³ Distinguiuse entre os trinta, pero non se igualou ós tres. David fíxoo xefe da súa escolta.

²⁴ Asael, irmán de Ioab, era un dos trinta. Figuraban entre os trinta: Elhanán, fillo de Dodó, de Belén;

²⁵ Xamah, o de Harod; Elicá, o de Harod;

²⁶ Heles, o peleteo; Irá, fillo de Equex, de Tecoa;

²⁷ Abiézer, de Anatot; Sibecai, de Huxah;

²⁸ Salmón, o ahohita; Mahrai, de Netofah;

²⁹ Héleb, fillo de Baanah, de Netofah; Itai, fillo de Ribai, de Guibah de Benxamín;

³⁰ Benaías, de Piratón; Hidai, dos vales de Gaax;

³¹ Abialbón, de Arabah; Azmávet, de Bahurim;

³² Eliahbá, de Xaalbón; Iaxén, de Nun;

³³ Iehonatán, fillo de Xamah, de Harar; Ahiam, fillo de Xarar, de Arar;

³⁴ Elifélet, fillo de Ahasbai, de Bet Macah; Eliam, fillo de Ahitófel, de Guiló;

³⁵ Hesrai, de Carmel; Parai, de Arab;

³⁶ Igal, fillo de Natán, de Sobah; Baní, de Gad;

³⁷ Sélec, o amonita; Nahrai, de Beerot, escudeiro de Ioab, fillo de Seruiah;

³⁸ Irá, de Iatir; Gareb, de Iatir;

³⁹ Urías, o hitita. En total, trinta e sete.