2 Samuel 2 - Biblia SEPT

DAVID, REI DE XUDÁ E DE ISRAEL (2 Sam 2-8) Rei de Xudá en Hebrón

¹ Despois diso, David consultou o Señor: —"Debo subir a algunha das cidades de Xudá?" E o Señor respondeulle: —"Sube". David preguntou: —"A cal delas?" O Señor respondeulle: —"A Hebrón".

² David subiu alá coas súas dúas mulleres, Ahinoam de Iezrael e Abigail, a que fora muller de Nabal de Carmel.

³ David levou tamén os seus homes, cada un coa súa familia, e establecéronse nos arredores de Hebrón.

⁴ Viñeron os homes de Xudá e unxiron alí a David por rei da casa de Xudá. David tivo noticia de que os veciños de Iabex de Galaad lle deran terra a Xaúl

⁵ e mandou mensaxeiros para dicirlles ós de Iabex: —"O Señor volo pague, pois fixestes unha boa obra, ó dardes terra a Xaúl, voso señor.

⁶ Que agora o Señor vos trate a vós con misericordia e lealdade. Eu tamén vos tratarei ben, por esta boa obra que fixestes.

⁷ Vós recobrade o valor e sede fortes. Agora que o voso señor Xaúl morreu, a casa de Xudá unxiume a min para que sexa o seu rei".

Abner e Ioab

⁸ Pero Abner, fillo de Ner, xeneral de Xaúl, colleu a Ixbóxet, fillo de Xaúl, levouno a Mahanaim

⁹ e proclamouno rei sobre Galaad, sobre Iezrael, sobre Efraím, sobre Benxamín e sobre todo Israel.

¹⁰ Ixbóxet, fillo de Xaúl, tiña corenta anos cando empezou a reinar sobre Israel e reinou por dous anos. Soamente a casa de Xudá seguía a David.

¹¹ O reinado de David en Hebrón, sobre a casa de Xudá, foi de sete anos e medio.

¹² Abner, fillo de Ner, e os seguidores de Ixbóxet, fillo de Xaúl, saíron de Mahanaim para Gabaón.

¹³ Da outra parte viña Ioab, fillo de Seruiah, cos seguidores de David. Encontráronse todos onda o estanque de Gabaón, apostándose uns dun lado da represa e os outros do outro.

¹⁴ Abner propúxolle a Ioab: —"Que saian uns poucos mozos e que loiten ás nosas vistas". Ioab respondeulle: —"Que saian".

¹⁵ Por Ixbóxet, fillo de Xaúl, presentáronse doce benxaminitas, e por David, doce dos seus seguidores.

¹⁶ Cada un agarrou pola cabeza o seu contrario e cravoulle a espada nas costelas; e caeron todos a unha. A aquel lugar, que está onda Gabaón, chamóuselle campo do Costelar.

¹⁷ O combate foi rexo aquel día. Abner e os homes de Israel foron vencidos polos seguidores de David.

¹⁸ Estaban alí os tres fillos de Seruiah, Ioab, Abixai e Asael. Asael tiña os pés lixeiros, coma unha gacela,

¹⁹ e correu perseguindo a Abner, sen apartarse de detrás del, nin á dereita nin á esquerda.

²⁰ Abner volveuse e preguntoulle: —"Es ti, Asael?" E el respondeulle: —"Son eu".

²¹ Abner díxolle: —"Torce á dereita ou á esquerda, agarra un deses homes e quítalle as armas". Pero Asael non quixo afastarse del.

²² Abner díxolle outra vez: —"Arreda de tras de min. Por que me obrigas a botarte á terra? Como me presentaría eu despois diante de Ioab, o teu irmán?"

²³ El non quixo arredarse e Abner feriuno coa lanza para atrás, dereito cara á illarga, e saíulle polo outro lado. Asael caeu morto alí mesmo. Os que chegaban ó lugar onde Asael caera morto, todos se detiñan.

²⁴ Ioab e Abixai saíron perseguindo a Abner. A posta do sol chegaron ó outeiro de Amá, enfronte de Guíah no camiño do ermo de Gabaón.

²⁵ Os benxaminitas xuntáronse facendo unha tropa con Abner e detivéronse no cume dun outeiro.

²⁶ Abner berroulle a Ioab: —"Seica non se fartará a espada de sangue? Non sabes que o final será amargo? Canto tardarás en dicirlle á túa xente que deixe de perseguir os seus irmáns?"

²⁷ Ioab respondeulle: —"Vive Deus que se non falases, o pobo non deixaría de perseguir os seus irmáns ata mañá".

²⁸ Ioab tocou a trompeta e todos se detiveron. Deixaron de perseguir a Israel e non seguiron combatendo.

²⁹ Abner e os seus homes camiñaron toda aquela noite polo ermo, pasaron o Xordán e, percorrendo todo Bitrón, chegaron a Mahanaim.

³⁰ Ioab deixou tamén de perseguir a Abner e reuniu a súa xente. Dos seguidores de David faltaban dezanove homes amais de Asael.

³¹ Pero os seguidores de David mataran trescentos sesenta benxaminitas dos homes de Abner.

³² O cadáver de Asael levárono consigo e enterrárono en Belén no sartego da súa familia. Ioab e os seus homes camiñaron a noite toda e amenceulles en Hebrón.