1 Timoteo 2 - Biblia SEPT

Hai que rezar por todos

¹ Recomendo primeiro de todo que se fagan peticións, oracións, súplicas, accións de grazas en favor de todos os homes,

² polos reis e por todos os que ocupan altos cargos, para que poidamos ter unha vida calma e serea baseada no pleno respecto mutuo e na decencia.

³ Isto é fermoso e grato a Deus noso Salvador.

⁴ El quere que todos os homes se salven e cheguen ó coñecemento da verdade.

⁵ Porque hai un único Deus e un único mediador entre Deus e os homes: o home Cristo Xesús,

⁶ que se entregou coma rescate por todos. Tal é o testemuño dado no tempo oportuno.

⁷ A min fíxome o seu pregoeiro e apóstolo digo a verdade e non minto, mestre dos xentís na fe e na verdade.

Actitude no culto

⁸ Por iso quero que en todos os sitios recen os homes levantando as mans limpas, sen ira nin discusións.

⁹ Do mesmo xeito tamén as mulleres, con vestido decente, con reverencia e modestia, que se adornen non con rizos, nin con ouro, nin margaridas, nin vestidos luxosos,

¹⁰ senón coas boas obras, como cómpre a mulleres que profesan unha piedade verdadeira.

¹¹ A muller que aprenda en silencio e con toda submisión.

¹² Non lle consinto á muller que ensine, nin domine ó home, senón que estea calada.

¹³ Porque primeiro crearon a Adam, despois a Eva.

¹⁴ E a Adam non o enganaron, senón que a muller se deixou enganar e caeu no pecado.

¹⁵ Salvarase, non obstante, grazas á súa maternidade, se se mantén na fe, no amor, na santidade e na modestia.