1 Samuel 8 - Biblia SEPT

Israel pide un rei

¹ Cando Samuel se fixo vello, puxo a seus fillos por xuíces de Israel.

² O primoxénito chamábase Xoel e o segundo Abías. Exercían coma xuíces en Beerxeba.

³ Pero os fillos non seguiron o camiño de Samuel, senón que se deixaron levar pola cobiza, aceptando regalos e torcendo o dereito.

⁴ Daquela xuntáronse os vellos de Israel, foron a Ramah onda Samuel

⁵ e dixéronlle: —"Velaí que ti estás vello e os teus fillos non van polo teu camiño. Dános, logo, un rei que nos goberne, coma o que teñen as outras nacións".

⁶ A Samuel pareceulle mal esa proposta: Dános un rei que nos goberne, e invocou ó Señor.

⁷ O Señor respondeulle: —"Atende ó pobo en todo o que che piden. Non te rexeitan a ti, senón a min, para que non reine sobre deles.

⁸ É o que fixeron sempre comigo, desde o día en que os saquei de Exipto ata hoxe: arredarse de min, para servir a outros deuses; iso é o que fan contigo.

⁹ Agora aténdeos no que piden, pero advírteos e dilles cal será o foro do rei que reinará sobre eles".

¹⁰ Samuel referiu ó pobo que pedía un rei o que lle dixera o Señor.

¹¹ Díxolle: —"Este é o foro do rei que reinará sobre vós: collerá os vosos fillos, para servizo dos seus carros e da súa cabalería e para que corran diante da súa carroza.

¹² Poraos de xefes de milleiro e de xefes de cincuentena; faralles arar as súas leiras e segar o seu trigo, fabricar armas para a guerra e trebellos para os carros.

¹³ As vosas fillas levaraas para perfumistas, cociñeiras e panadeiras.

¹⁴ Quitaravos o mellor dos vosos eidos, das vosas viñas e oliveiras, para dárllelo ós seus servidores.

¹⁵ Esixiravos o décimo do voso gran e das vosas vendimas, para dárllelo ós seus ministros e ós seus funcionarios.

¹⁶ Botará man dos vosos criados e criadas, dos vosos bois e dos vosos burros, para que fagan para el o seu traballo.

¹⁷ Decimará os vosos rabaños, e vós seredes os seus escravos.

¹⁸ Entón berraredes en contra do rei que escollestes, pero o Señor non responderá".

¹⁹ O pobo non lle fixo caso a Samuel e insistiu: —"Non. Nós queremos un rei!

²⁰ Seremos coma as outras nacións. Teremos un rei que nos goberne e que saia á fronte de nós nas nosas guerras".

²¹ Samuel escoitou o que o pobo pedía e referiullo ó Señor.

²² O Señor díxolle a Samuel: —"Atende a súa demanda e noméalles un rei". Entón ordenoulles Samuel ós israelitas: —"Ídevos cada un para o voso lugar".