1 Samuel 31 - Biblia SEPT

Morte de Xaúl e de Ionatán

¹ Os filisteos abriron o combate en contra de Israel. Os soldados de Israel retrocederon diante dos filisteos e moitos caeron nos montes de Guilboa.

² Os filisteos seguiron de preto a Xaúl e a seus fillos e feriron de morte a Ionatán, a Abinadab e a Melquixúa, fillos de Xaúl.

³ O peso do combate caeu sobre Xaúl. O daren con el os arqueiros, ferírono gravemente.

⁴ Xaúl díxolle entón ó escudeiro: —"Saca a túa espada e atravésame con ela, primeiro de que cheguen eses incircuncisos, me atravesen eles e fagan escarnio de min". Pero o escudeiro non quixo atravesalo, pois estaba morto de medo. Entón colleu Xaúl a súa espada e deixouse caer por riba dela.

⁵ En vendo o escudeiro que morrera Xaúl, botouse el tamén sobre a súa espada e morreu con el.

⁶ Morreron no mesmo día Xaúl e os seus tres fillos, o seu escudeiro e moitos dos seus homes.

⁷ Cando os israelitas que vivían do outro lado do val e en Transxordania, viron que os soldados de Israel fuxían e que morreran Xaúl e seus fillos, abandonaron as súas cidades e escaparon. E os filisteos establecéronse alí.

⁸ O día seguinte foron os filisteos espoliar os cadáveres e atoparon a Xaúl e a seus tres fillos mortos no monte Guilboa.

⁹ Tronzáronlle a cabeza, quitáronlle as súas armas e mandáronas por todo o país dos filisteos, levando a boa nova ós seus ídolos e ó seu pobo.

¹⁰ As súas armas puxéronas no templo de Axtarté e o cadáver pendurárono nos muros de Bet—Xeán.

¹¹ Cando souberon todo iso e o que os filisteos fixeran con Xaúl, os veciños de Iabex de Galaad

¹² erguéronse, todos os valentes de entre eles, camiñaron a noite toda e tiraron dos muros de Bet—Xeán o cadáver de Xaúl e os de seus fillos. Leváronos a Iabex e alí queimáronos.

¹³ Despois recolleron os seus ósos, enterráronos debaixo do tamarisco de Iabex e xaxuaron sete días.