1 Samuel 27 - Biblia SEPT

David cos filisteos

¹ David botou estas contas: —"Calquera día acabarei no poder de Xaúl. Non me queda outro remedio que escapar ó país dos filisteos. Entón deixará Xaúl de perseguirme por todo o territorio de Israel e quedarei a salvo da súa man".

² David pasouse cos seus seiscentos homes onda Aquix, fillo de Maoc, rei de Gat,

³ e quedaron a vivir todos en Gat, terra de Aquix, cada un coa súa familia. David levaba as súas dúas mulleres, Ahinoam de Iezrael e Abigail, a que fora muller de Nabal de Carmel.

⁴ Dixéronlle a Xaúl que David fuxira cara a Gat e deixou de perseguilo.

⁵ David díxolle a Aquix: —"Se merezo o teu favor, que me concedan un lugar nunha poboación do campo e que me permitan vivir nela. Por que ía vivir este teu servo ó teu lado na cidade real?"

⁶ E naquel mesmo día Aquix cedeulle Siquelag. Por iso pertence Siquelag ós reis de Israel ata o día de hoxe.

⁷ David residiu en terras filisteas un ano e catro meses.

⁸ David saía cos seus homes e facía incursións no territorio dos guexuritas, dos guircitas e dos amalecitas, pobos que habitaban na bisbarra, que vai de Telam cara Xur ata a fronteira de Exipto.

⁹ David arrasaba aquela terra sen deixar vivo nin home nin muller e pillaba ovellas e vacas, burros, camelos e roupas e logo volvía onda Aquix.

¹⁰ Aquix preguntáballe: —"Onde saqueastes hoxe?" E David respondíalle: —"No Négueb de Xudá, no dos ierahmelitas ou no dos quenitas".

¹¹ David non traía vivos a Gat nin home nin muller, para que logo non puidesen dicir del: —"David fixo isto e aquilo". Ese foi o seu proceder, mentres estivo en terras filisteas.

¹² Aquix fiábase de David e pensaba del: —"Incomodouse co seu pobo de Israel e será para sempre o meu vasalo".