1 Reis 9 - Biblia SEPT

Nova aparición de Deus

¹ Cando Salomón acabou de construír o templo do Señor e o pazo real e rematou os proxectos todos que fixera,

² Aparecéuselle de novo o Señor, como en Gabaón,

³ e díxolle: —"Oín a túa oración e a súplica que me fixeches, polo que santifico este templo que ti edificaches, para que nel more para sempre o meu nome. Nel terei sempre postos os meus ollos e o meu corazón.

⁴ En canto a ti, se camiñas na miña presenza, como fixo teu pai David, con recto e sinxelo corazón, facendo o que che mando, gardando as miñas normas e as miñas decisións,

⁵ eu farei firme para sempre o teu trono real sobre Israel, conforme lle prometín a teu pai David. Non che fallará un descendente, que se sente no trono de Israel.

⁶ Pero, se vós ou vosos fillos vos afastades de min, se non gardades os mandatos e os preceptos que eu vos dei, se vos ides servir deuses estraños e vos prostrades diante deles,

⁷ eu botarei a Israel da terra que lle dei, arredarei da miña vista este templo, que santifiquei para honra do meu nome, e Israel será o refrán e o riso para todos os pobos.

⁸ Este templo converterase nun pardiñeiro, e os que pasen diante del pasmaranse e asubiarán, e dirán: —Por que tratou deste xeito o Señor esta terra e este templo?

⁹ E responderanlles: —Porque abandonaron ó Señor, seu Deus, que tirara de Exipto a seus pais, e apegáronse a deuses alleos, prostráronse diante deles e adoráronos. Por iso o Señor botou riba deles todas estas desgrazas".

Terra de Cabul

¹⁰ Nos vinte anos que empregou Salomón para construír as dúas casas, o templo do Señor e o pazo real,

¹¹ Hiram, rei de Tiro, forneceu a Salomón das madeiras de cedro e de ciprés e de todo o ouro que quixo. En compensación, o rei Salomón deulle a Hiram vinte cidades na rexión de Galilea.

¹² Foi Hiram de Tiro ver as cidades que lle dera Salomón, e non lle gustaron.

¹³ Dixo: —"Que clase de cidades son esas que me deches, irmán?" E chamounas Cabul, nome que levan ata hoxe.

¹⁴ Hiram mandáralle a Salomón catro mil quilos de ouro.

Recrutamento de traballadores

¹⁵ Agora falaremos do recrutamento de traballadores que fixo o rei Salomón para construír o templo, o pazo real, o terraplén, os muros de Xerusalén, e mais Hasor,

Meguido e Guézer.

¹⁶ O faraón, rei de Exipto, subira para apoderarse de Guézer e puxéralle lume; matara os cananeos que habitaban na cidade e déralla en dote á súa filla, muller de Salomón.

¹⁷ Salomón reconstruíu Guézer, Bet—Horón de Abaixo,

¹⁸ Balat, Tamar da estepa

¹⁹ e todas as cidades de aprovisionamento que o rei tiña, mais as cidades de carros e cabalos e canto se lle antollou construír en Xerusalén, no Líbano e en todos os seus dominios.

²⁰ Salomón recrutou para traballos forzados, cousa que rexe ata hoxe, toda a xente non israelita que quedara dos amorreos, dos hititas, dos perizitas, dos hivitas e dos iebuseos.

²¹ Os seus descendentes seguiron no país, pois os israelitas non os exterminaran.

²² Os israelitas non os empregou coma escravos, senón coma guerreiros, mordomos, xefes e oficiais, comandantes de carros e de cabalería.

²³ Os capataces que vixiaban as obras de Salomón e que tiñan o mando sobre os traballadores eran cincocentos cincuenta.

²⁴ Cando a filla de Salomón subiu da cidade de David ó pazo que Salomón lle construíra, foi cando el fixo edificar o terraplén.

²⁵ Salomón ofrecía tres veces ó ano holocaustos e sacrificios pacíficos no altar que lle construíra ó Señor, queimaba nel pos recendentes diante do Señor. El tiña tamén a conservación do templo ó seu coidado.

A flota de Salomón

²⁶ O rei Salomón construíu unha flota en Esion Guéber, preto de Elat, na beira do mar Morto, no país de Edom.

²⁷ Hiram mandou nesa flota, cos homes de Salomón, algúns mariñeiros servos seus, xente que coñecía ben o mar.

²⁸ Chegaron ata Ufir, de onde trouxeron ó rei Salomón quince mil quilos de ouro.