1 Crónicas 11 - Biblia SEPT

David Rei

¹ Todo Israel congregouse arredor de David en Hebrón, dicindo: —"Mira: ti es óso dos nosos ósos e carne da nosa carne.

² Xa antes, aínda reinando Xaúl, eras ti o definitivo xefe de Israel. Iavé, o teu Deus, díxoche: Ti apacentarás o meu pobo de Israel e ti serás o xefe do meu pobo Israel".

³ Así todos os anciáns de Israel viñeron ó rei, a Hebrón, e David fixo con eles alianza en Hebrón, diante de Iavé. Unxiron a David por rei de Israel, segundo a palabra de Iavé pronunciada por Samuel.

Conquista de Xerusalén

⁴ Marchou David con todo Israel contra Xerusalén que se chamaba Iebús. Habitaban alí os iebuseos.

⁵ Os habitantes de Iebús dixeron a David: —"Ti non entrarás aquí". Pero David apoderouse da fortaleza, de Sión, que é a cidade de David.

⁶ David dixera: —"Quen primeiro mate a un iebuseo será xefe e príncipe". Ioab, fillo de Seruiah, foi o primeiro en subir, e foi feito xefe.

⁷ David estableceuse na fortaleza, que por isto se chamou a cidade de David.

⁸ Edificou a cidade no seu arredor, desde o Miló, mentres Ioab reconstruíu o resto da cidade.

⁹ David veu ser cada día máis grande e Iavé Sebaot estaba con el.

¹⁰ Velaquí os primeiros dos valentes que seguiron a David e o axudaron con todo Israel a asegurar o seu dominio e facer o rei de Israel segundo a palabra de Iavé.

¹¹ Velaquí os nomes dos valentes que seguiron a David: Iaxobam, fillo de Hacmoní, primeiro da terna, que brandiu a súa lanza contra trescentos homes que derrotou dunha vez.

¹² Despois del, Elazar, fillo de Dodó, ahohita, outro dos tres.

¹³ Estaba este con David en Pas—Damim, onde os filisteos se reuniran para a loita; había alí unha leira de cebada, e, fuxindo o pobo xa ante os filisteos,

¹⁴ púxose no medio da leira e defendeuna e derrotou ós filisteos. Iavé outorgou así unha gran vitoria.

¹⁵ Tres dos trinta baixaron onde estaba David á rocha da caverna de Adulam, cando estaban acampados os filisteos no val de Refaím.

¹⁶ David estaba no refuxio, e os filisteos tiñan unha gornición en Belén.

¹⁷ Deu David en dicir: —"Quen puidese beber auga do depósito que está ás portas de Belén!".

¹⁸ E entón os tres atravesaron o campamento dos filisteos, colleron auga do depósito que está ás portas de Belén, e, levándoa, presentáronlla a David. Pero David negouse a bebela e derramouna en libación ante Iavé,

¹⁹ dicindo: —"Líbreme Deus de facer tal cousa! Sería como beber o sangue destes homes que con risco da súa vida foron alá" (porque era certamente con risco das súas vidas como a trouxeran). E non quixo bebela. Isto fixeron os tres valentes.

²⁰ Abixaí, irmán de Ioab, era xefe dos trinta. Brandiu a súa lanza contra trescentos, que matou, e tivo sona entre os trinta,

²¹ e era o máis considerado entre eles, chegando a ser xefe deles, pero non chegou a igualar ós tres.

²² Despois viña Benaías, fillo de Iehoiadá, home de moito valor e coñecido polas súas fazañas. Era oriúndo de Cabsel. Matou a dous valentes de Moab, e un día de neve baixando a unha cisterna, matou un león.

²³ Matou tamén a un exipcio que tiña cinco cóbados de alto e unha lanza coma unha agulla de tecedeira. Baixou contra el cun pau e arrincoulle a lanza da man, matándoo con ela.

²⁴ Isto fixo Benaías, fillo de Iehoiadá, que tivo gran sona entre os trinta.

²⁵ Foi moi considerado entre eles, pero non chegaba ós tres primeiros. David púxoo á fronte da súa garda.

²⁶ Os valentes do exército eran: Asael, irmán de Ioab, Elhanán, fillo de Dodó, de Belén;

²⁷ Xamot, o arorita, e Heles, o pelonita;

²⁸ Irá, fillo de Iquex, o tecoíta; Abiézer, de Anatot;

²⁹ Sibcai, de Huxah, Ilai, ahohita;

³⁰ Mahrai, de Netofah; Héled, fillo de Banah, de Netofah.

³¹ Itai, fillo de Ribai, de Guibah, dos fillos de Benxamín; Benaías, de Piratón;

³² Hurai, dos vales de Gáax; Abiel, da Arabah;

³³ Azmávet, de Bahurim; Eliahbá, Xalbonita;

³⁴ Iaxén, gunita; Ionatán, fillo de Xagueh, de Harar;

³⁵ Ahiam, fillo de Sacar, de Harar; Elifal, fillo de Ur;

³⁶ Héfer, de Mequerah; Ahías, de Pelón;

³⁷ Hesró, do Carmel; Narai fillo de Ezbai

³⁸ Ioel irmán de Natán; Mibhar, fillo de Hagri;

³⁹ Sélec, amonita; Nahrai de Berot, escudeiro de Ioab, fillo de Seruiah;

⁴⁰ Irá, de Iatir; Gareb, de Iatir;

⁴¹ Urías, o hitita; Zabad, fillo de Ahlai;

⁴² Adiná, fillo de Xizá, rubenita, xefe dos rubenitas, e con el trinta máis;

⁴³ Hanán, fillo de Macah; Ioxafat, o mitnita;

⁴⁴ Uzías, de Axtarot; Xamá e Ieuel fillos de Hotam, de Aroer;

⁴⁵ Iediel, fillo de Ximrí; Iohá, seu irmán, tisita;

⁴⁶ Eliel, mahavita; Ieribai e Ioxavías, fillos de Elnáham; Itmah, moabita;

⁴⁷ Eliel, Obed e Iasiel, de Sobah.