1 Corintios 8 - Biblia SEPT

AS CARNES SACRIFICADAS ÓS ÍDOLOS Os principios teóricos

¹ No que toca ás carnes inmoladas ós ídolos, é ben sabido que todos temos coñecemento. Pero o coñecemento incha, mentres que a caridade é construtiva.

² Se alguén cre que xa coñece algo, aínda non coñece como hai que coñecer.

³ En troques, se alguén ama a Deus, Deus coñéceo a el.

⁴ Así que verbo de comer as carnes sacrificadas ós ídolos, sabemos que ningún ídolo existe de verdade no mundo, nin deus ningún fóra do Único.

⁵ Porque, aínda que haxa moitos deuses de nome, tanto no ceo coma na terra e hai efectivamente moitos deuses e moitos señores,

⁶ para nós non hai máis ca un só Deus, o Pai, de quen todo procede e para quen nós estamos feitos; nin hai máis ca un só Señor, Xesús Cristo, por quen todo existe e por quen existimos nós mesmos.

O punto de vista da caridade

⁷ Pero non todos teñen este coñecemento. Algúns, por estaren afeitos ata agora á mentalidade idolátrica, comen esa carne coma se fose sagrada; entón, a súa conciencia, por non estar segura, quédalles lixada.

⁸ Desde logo, non é a comida o que nos achega a Deus: non imos ser menos por non comer, nin por comer imos ser máis.

⁹ Pero tede coidado de que esa liberdade vosa non sexa tropezo para os débiles.

¹⁰ Porque, se alguén te ve a ti, que tes coñecemento, sentado á mesa nun templo idolátrico, non é certo que, a quen non está aínda seguro, o vai tentar a conciencia a comer o sacrificado ós ídolos?

¹¹ Así, polo teu coñecemento pérdese o débil, ese irmán por quen morreu Cristo.

¹² Dese xeito, pecando contra os irmáns e ferindo a súa débil conciencia, pecades contra Cristo.

¹³ Por iso, se unha comida escandaliza a un irmán meu, endexamais non probarei a carne, para non escandalizar a meu irmán.