Тооллого 6 - Ариун Библи 2013

Назир хүн

¹ ЭЗЭН, Мосетэй ярин —

² Израилийн хөвгүүдтэй ярин тэдэнд ийн хэлтүгэй. “Эр, эм аливаа хүн онцгой ам өчиг болох назирийн ам өчгийг тавьж, өөрийгөө ЭЗЭНд ариусган тусгаарлах аваас

³ тэр хүн дарс болон сархдыг цээрлэж, дарсны цууг эсвэл сархдаар хийсэн цууг уух ёсгүй, усан үзмийн шүүсийг ч уух ёсгүй, шинэ юмуу хатаасан усан үзмийг ч идэх ёсгүй.

⁴ Тусгаарлалтынхаа бүх өдөрт тэрээр үрээс нь авахуулаад хальсыг нь хүртэл усан үзмийн модны ямар ч бүтээгдэхүүнийг идэх ёсгүй.

⁵ Тусгаарлалтынх нь ам өчгийн бүх өдөрт толгойд нь тонгорог хүрэх ёсгүй. ЭЗЭНд өөрийгөө тусгаарласан өдрүүд нь дуустал тэрээр ариун байх ёстой. Тэрээр толгойнхоо үсийг урт ургуулах ёстой.

⁶ ЭЗЭНд тусгаарлагдсан бүх өдрүүдэд тэрээр үхсэн хүнд ойртож болохгүй.

⁷ ЭЗЭНий ариусган тусгаарлалт түүний толгой дээр байгаа учир эцэг, эх, ах, эгч дүүгээ өөд болох үед ч тэр тэдний төлөө өөрийгөө бузарлах ёсгүй.

⁸ Тусгаарлалтын бүх өдрүүдэд тэрээр ЭЗЭНд ариун болой.

⁹ Харин түүний дэргэд хүн гэв гэнэтхэн үхэж, тэрээр ариусган тусгаарласан толгойгоо бузарласан байх аваас цэвэрших өдөр тэрээр үсээ хусах ёстой. Тэрээр долоо дахь өдөр үсээ хусах ёстой.

¹⁰ Найм дахь өдөр тэрээр уулзалтын майхны үүдэнд тахилчид хоёр хүүрзгэнэ эсвэл хоёр өсвөр тагтааг авчрах ёстой.

¹¹ Тахилч нэгийг нь нүглийн тахилд, нөгөөг нь шатаалт тахилд өргөж, үхсэн хүнээс болж нүгэл үйлдсэнд нь түүнд эвлэрүүллийг хийх бөгөөд тэр өдрөө мөнөөх хүний толгойг ариусгана.

¹² Тэрээр назир байх өдрүүдээ ЭЗЭНд ариусган тусгаарлаж, ялын тахилд эр хурга авчирна. Харин түүний тусгаарлалт бузартсан байсан тул урьдын өдрүүд нь алдагдах болно.

¹³ Назирийн хууль энэ юм. Тэр хүний тусгаарлалтын өдрүүд дуусахад түүнийг уулзалтын майхны үүдэнд авчрах ёстой.

¹⁴ Тэр хүн тахилаа ЭЗЭНд өргөхдөө шатаалт тахилд согоггүй эр хурга нэгийг, нүглийн тахилд согоггүй охин төлөг нэгийг, эвийн тахилд согоггүй хуц нэгийг

¹⁵ мөн исгээгүй талх нэг сагсыг, тосоор багсарсан, сайн гурилан исгээгүй боов, тос түрхсэн исгээгүй бин зэргийг идээн өргөл болон ундаан өргөлүүдийнх нь хамт авчрах болой.

¹⁶ Тахилч эдгээрийг ЭЗЭНий өмнө авчрах бөгөөд тэр хүний нүглийн тахил ба шатаалт тахилыг өргөнө.

¹⁷ ЭЗЭНд эвийн тахилын нядлах тахил болгон хуцыг нэг сагс исгээгүй талхны хамт өргөх бөгөөд тахилч мөн үүний идээн өргөл болон ундаан өргөлүүдийг өргөх ажгуу.

¹⁸ Назир хүн ариусган тусгаарласан толгойгоо уулзалтын майхны үүдэнд хусаж, толгойнхоо ариусган тусгаарлагдсан үсийг авч, эвийн тахилын өргөлийн доор байх галд хийнэ.

¹⁹ Тахилч, хуцын чанасан далыг мөн сагснаас исгээгүй нэг боов болон исгээгүй нэг бинг авч, ариусган тусгаарлалтын үсээ хуссаных нь дараа назирийн гар дээр тавина.

²⁰ Тахилч тэдгээрийг ЭЗЭНий өмнө даллах өргөл болгон даллах ажгуу. Энэ нь даллан өргөсөн өвчүү болон хандивын гуяны хамт тахилчид ариун болой. Үүний дараа назир хүн дарс ууж болно.

²¹ Олж авчирч чадах юмандаа нэмэлт болгон, тусгаарлалтынхаа төлөө ЭЗЭНд өргөхөөр ам өгсөн назирийн хууль энэ юм. Тэрээр тусгаарлалтын хуулийн дагуу, өгсөн ам өчгөөрөө үйлдэх ёстой” гэж айлдав.

Тахилчийн ерөөл

²² Мосед ЭЗЭН айлдан —

²³ Аарон болон түүний хөвгүүдэд “Израилийн хөвгүүдийг та нар ингэж ерөөгтүн. Та нар тэдэнд

²⁴ «Чамайг ЭЗЭН ерөөж, сахин хамгаалах болтугай.

²⁵ Чиний дээр ЭЗЭН царайгаа гэрэлтүүлж, чамайг өршөөх болтугай.

²⁶ ЭЗЭН чам уруу нүүрээ харуулж, Чамд амар тайвныг өгөх болтугай» гэж хэл” хэмээв.

²⁷ Тэд Израилийн хөвгүүдийн дээр Миний нэрийг дуудах бөгөөд Би тэднийг ерөөх болно гэв.