Тооллого 31 - Ариун Библи 2013

Мидианы эсрэг дайн

¹ ЭЗЭН, Мосетэй ярин —

² Израилийн хөвгүүдийн өшөөг мидианчуудаас авагтун. Дараа нь чи ард түмэн уруугаа одох болно гэв.

³ Мосе ард олонтой ярин —ЭЗЭНий өшөөг Мидианд гүйцэлдүүлэхээр Мидианы эсрэг явахын тулд дундаасаа эрчүүдийг дайнд зэвсэглэгтүн.

⁴ Израилийн бүх овогоос буюу овог бүрээс нэг мянгатыг та нар дайнд илгээх ёстой гэлээ.

⁵ Ингээд Израилийн мянгатуудаас, овог бүрээс нэг мянгатыг буюу арван хоёр мянгатыг дайнд гарган хуваарилав.

⁶ Овог бүрээс нэг мянгатыг Мосе дайнд илгээсэн бөгөөд тахилч Елеазарын хүү Финехас гартаа ариун савнууд болон түгшүүрийн дохионы бүрээнүүдийг аван тэдэнтэй хамт дайнд явав.

⁷ Мосед ЭЗЭНий тушаасан ёсоор тэд Мидианы эсрэг дайн хийж эр хүйстэн бүрийг нь алав.

⁸ Тэд бусад алагдагсдын хамтаар Мидианы хаадыг алсан билээ. Тэдгээр нь Мидианы таван хаан болох Еви, Рекем, Зур, Хур, Реба нар байв. Тэд бас Беорын хүү Балаамыг илдээр цавчин алав.

⁹ Израилийн хөвгүүд Мидианы эмэгтэйчүүдийг болон тэдний багачуудыг олзлон авч, тэдний бүх үхэр сүрэг, бүх бог малын сүрэг болон тэдний эд юмс бүхнийг дээрэмдэв.

¹⁰ Тэдний амьдарч байсан бүх хот, тэдний хуарангуудыг израильчууд галдан шатаав.

¹¹ Хүн ч бай, мал ч бай дээрмийн бүхнийг бас хамаг олзыг тэд авлаа.

¹² Тэд олзлогдогсод болон олзлон дээрэмдсэн юмсыг Иерихогийн харалдаах Иорданы дэргэд буй Моабын тал дахь хуаранд, Мосе, тахилч Елеазар ба Израилийн хөвгүүдийн хотол түмэнд авчирлаа.

Дайнаас буцаж ирэв

¹³ Тэднийг угтахаар Мосе, тахилч Елеазар болон хотол түмний бүх удирдагчид хуарангийн гадна гарцгаав.

¹⁴ Дайны талбараас ирсэн дайчдын захирагчид болох мянгатын дарга нар, зуутын дарга нарт Мосе уурлав.

¹⁵ Мосе тэдэнд —Та нар бүх эмэгтэйн амийг хэлтрүүлэв үү?

¹⁶ Харагтун, тэд Балаамын зөвлөгөөгөөр Пеорын хэрэг явдалд Израилийн хөвгүүдийг ЭЗЭНий эсрэг самуурахад хүргэсэн. Тиймээс ЭЗЭНий хотол түмэн дунд гамшиг ирсэн.

¹⁷ Тиймээс одоо, багачуудын дундах эр хүйстэн бүрийг мөн эрийн өвөрт орж үзсэн эмэгтэй болгоныг алагтун.

¹⁸ Харин эр хүнтэй хавьтаж үзээгүй эмэгтэйчүүд охид бүгдийг өөрсдөдөө хэлтрүүлэн үлдээгтүн.

¹⁹ Хүн алсан хэн боловч, алуулсан нэгэнд хүрсэн хэн боловч та нар хуарангийн гадна долоо хоног буудаллагтун. Та нар ба олзлогдогсод чинь гурав дахь, долоо дахь өдөр өөрсдийгөө цэвэршүүл.

²⁰ Хувцас бүр, арьсан эдлэл бүр, ямааны ноолууран бүх зүйл болон бүх модон эдийг өөрсдөдөө цэвэршүүлэгтүн гэлээ.

²¹ Тахилч Елеазар дайнд явсан бүх дайчдад —Мосед ЭЗЭНий тушаасан хуулийн зарлиг энэ болой.

²² Алт, мөнгө, хүрэл, төмөр, цагаан тугалга, хар тугалга,

²³ галд тэсвэртэй бүхнийг та нар гал дундуур гаргах ёстой. Тэгээд энэ нь цэвэр болно. Түүнчлэн бузраас цэвэршүүлэх усаар цэвэршүүлж болно. Харин галд тэсвэргүй алив бүхнийг усан дундуур гарга.

²⁴ Та нар долоо дахь өдөр хувцсаа угаан цэвэр болж, дараа нь та нар хуаранд орж болно гэв.

Олзоо хуваасан нь

²⁵ ЭЗЭН, Мосетэй ярин —

²⁶ Чи, тахилч Елеазар мөн хотол түмний эцгүүдийн бүлийн тэргүүнүүд та нар дээрэмдсэн олз омог болох хүн, малын аль алины нийлбэр тоог ав.

²⁷ Олз омогийг дайнд явсан дайчид болон хотол түмний дунд хуваагтун.

²⁸ Дайнд явсан дайчдаас ЭЗЭНд алба гувчуур болгон хүн, мал, илжиг, хонины таван зуугаас нэгийг нь хураан ав.

²⁹ Үүнийг тэдний хагасаас аваад, ЭЗЭНд хандив болгохоор тахилч Елеазарт өгөгтүн.

³⁰ Израилийн хөвгүүдийн хагасаас хүн, мал, илжиг, хонь болон бүх амьтны тавь тутмаас нэгийг авч, ЭЗЭНий асрын үүргийг сахиж буй левичүүдэд өгөгтүн гэв.

³¹ Мосе болон тахилч Елеазар нар Мосед ЭЗЭНий тушаасан ёсоор хийв.

³² Дайчдын дээрэмдсэн олзноос үлдсэн олз омог нь зургаан зуун далан таван мянган хонь,

³³ далан хоёр мянган үхэр,

³⁴ жаран нэгэн мянган илжиг,

³⁵ хүмүүсээс, эр хүнтэй хавьтаж үзээгүй гучин хоёр мянган эмэгтэй байлаа.

³⁶ Эхний хагас болох дайнд явагсдын хувь нь гурван зуун гучин долоон мянга таван зуун толгой хонь байсан бөгөөд

³⁷ хониноос авсан ЭЗЭНий алба гувчуур зургаан зуун далан тав байв.

³⁸ Үхэр гучин зургаан мянга байсан бөгөөд тэндээс ЭЗЭНий алба гувчуурт далан хоёрыг нь авав.

³⁹ Илжиг гучин мянга таван зуу байсан бөгөөд ЭЗЭНий алба гувчуурт жаран нэгийг нь авав.

⁴⁰ Амьд хүн арван зургаан мянга байсан бөгөөд ЭЗЭНий алба гувчуурт гучин хоёр хүнийг авав.

⁴¹ Мосед ЭЗЭНий тушаасан ёсоор тахилч Елеазарт өгөх ЭЗЭНий хандив буюу алба гувчуурыг Мосе өгчээ.

⁴² Дайнд явсан эрчүүдээс Мосегийн тусгаарласан Израилийн хөвгүүдийн нөгөө хагасаас

⁴³ буюу хотол түмний хагасаас гурван зуун гучин долоон мянга таван зуун хонь,

⁴⁴ гучин зургаан мянган үхэр,

⁴⁵ гучин мянга таван зуун илжиг,

⁴⁶ арван зургаан мянган амьд хүн байлаа.

⁴⁷ Өөрт нь ЭЗЭНий тушаасан ёсоор, Израилийн хөвгүүдийн хагасаас хүн, малын тавь бүрээс нэгийг Мосе авч, ЭЗЭНий асрын үүргийг сахиж байсан левичүүдэд тэдгээрийг өгөв.

⁴⁸ Түмэн цэргийн дарга нар болох мянгатын дарга ба зуутын дарга нар Мосе дээр очиж,

⁴⁹ Мосед —Бидний удирдлага дор буй дайчдад таны зарц бид тооллого явуулсан бөгөөд биднээс нэг ч хүн дутагдаагүй.

⁵⁰ Тиймээс бид амийнхаа төлөө ЭЗЭНий өмнө эвлэрүүллийг хийлгэхээр хүн бүрийн олсон алтан эдлэл, гарын зүүлт, бугуйвч, тамган бөгж, ээмэг ба хүзүүний зүүлтүүдийг ЭЗЭНд өргөл болгон авчрав гэлээ.

⁵¹ Мосе болон тахилч Елеазар нар үнэт эдлэлүүд болох тэр алтыг тэднээс авав.

⁵² Мянгатын дарга, зуутын дарга нараас ЭЗЭНд өргөсөн өргөлийн бүх алт нь арван зургаан мянга долоон зуун тавин шекел байлаа.

⁵³ Дайчдаас хүн бүр өөртөө олз авсан байлаа.

⁵⁴ Мосе ба тахилч Елеазар нар мянгатын болон зуутын дарга нараас алтыг нь аваад түүнийг ЭЗЭНий өмнө Израилийн хөвгүүдийн төлөөх санамж болгон уулзалтын майханд авчрав.