Соломоны дуун 1 - Ариун Библи 2013

¹ Соломоны хэмээх дуу дууны дуун.

Сүйт бүсгүй ба нөхдийн дуун

² Уруулаараа шимэнхэн намайгаа тэр үнсэг! Учир нь хайр чинь дарснаас ч таатай.

³ Тос чинь анхи сэнхийн үнэртэй Нэр чинь цутгасан тос адил тул эмс охид чамд дурлана.

⁴ Араасаа намайг дагуулаач Алив бушуухан гүйцгээе Хаантан намайг лавриндаа авчирвай. Таныгаа бид бахданхан, баясалдаж —Дарснаас ч илүүтэйеэ хайрыг тань дээдэлнэм Танд тэдний дурладаг нь зөв байнам.

⁵ Кедарын майхан, Соломоны хөшиг мэт Хар ч гэлээ би үзэсгэлэнтэй Иерусалимын охид оо!

⁶ Бор зүснээс минь болж өөчилж ширтэх юун Нар л намайг өөлж ширтчихсэн юм. Уурлаж хилэгнээд эхийн минь хөвгүүд Усан үзмийн талбайн арчлагч болгочихсон юм, намайг Амь хувийн талбайгаа арчлалгүй ийм болчихсон юм, би.

⁷ Амин голын хайрт чи минь Альхан газар сүргээ хариулж Амруулж үд дээр хэвтүүлэхээ хэлээч. Нөхдийн чинь сүргийн дэргэд би Нүүрэндээ гивлүүртэй эм адил байх хэрэг үү?

⁸ —Бүсгүйчүүл дундаас бүр ч сайхан чи Магад мэдэхгүй аваас малын чийрийг даган ирж Малчдын майхны ойролцоо ишигнүүдээ ээрч тогтоо.

Сүйт залуу, нөхөд ба сүйт бүсгүй

⁹ Фараоны тэрэгнүүд дундах гүүтэй Хайртаа би харьцуулнам билээ.

¹⁰ Унжлага зүүлтэт хацар Уран сондорт хүзүү чинь жавхаалаг.

¹¹ Цацаг мөнгөт алтан зүүлтийг Чамдаа бид урлах болно.

¹² Хаантан сууриндаа залрахуй Задийн минь үнэр анхилмуй.

¹³ Хөхний минь дундах миррэн багцтай Хонгор амраг минь адил баймуй.

¹⁴ Энхрий хайрт минь наддаа Енгедийн усан үзмийн талбайн Суман цэцгийн хонгорцог амуй.

¹⁵ А-яа хайр минь чи юутай үзэсгэлэнтэй Ай-даа чи мөн ч үзэсгэлэнтэй Аньсага нүд нь тагтааных гэлтэй.

¹⁶ —А-яа хайрт минь, чи юутай үзэсгэлэнтэй Арга нь үгүй дурыг булаам Зөөлөн буйдан маань зүлэг ногоон

¹⁷ Өргөө дээвэр маань хуш модон Адар тааз нь агар модон.