Мика 1 - Ариун Библи 2013

¹ ЭЗЭНий энэ үг Иудагийн хаад Иотам, Ахаз, Хезекиагийн өдрүүдэд Морешетын хүн Микад ирсэн бөгөөд үүнийг тэр Самари болон Иерусалимын тухайд харжээ.

Самарид оноох шийтгэл

² Сонсогтун, ард түмэн бүгд ээ, Сонордогтун, дэлхий хийгээд түүнийг дүүргэгчид ээ! Эзэн ариун сүмээсээ, Эзэн БУРХАН та нарын эсрэг гэрчлэгч байг.

³ Үзэгтүн, ЭЗЭН орших газраасаа гараад Бууж ирэн, газрын өндөрлөгүүдийг гишгэчнэ.

⁴ Түүний дор уулс нь хайлж, Хөндий талууд хуваагдан Галын дэргэдэх лааны тос мэт Хясаанаас цутгах ус мэт болно.

⁵ Энэ бүгд нь Иаковын гэмт үйлдэл, Израилийн гэрийн нүглээс болсон юм. Иаковын гэмт үйлдэл хэнээс вэ? Самариас биш үү? Иудагийн өндөр газрууд аль вэ? Иерусалим биш үү?

⁶ Иймээс Би Самарийг хээр тал дахь сүйрлийн овоо, Усан үзмийн төгөл суулгах газар болгоод, Чулууг нь хөндийд асгаж, Суурийг нь ил гаргана.

⁷ Хамаг шүтээн нь хага цохигдож, Хөлс бүхэн нь галаар шатаагдана. Хөрөг бүхнийг нь Би устгана. Янхны хөлсөөр цуглуулсан тул Янхны хөлс л болж тэд хувирна.

Иудагийн хотуудын сүйрэл

⁸ Үүнээс болоод гашуудан, уйлж, хөл нүцгэн, шалдан явж, Цөөвөр чоно мэт улин, Тэмээн хяруул мэт гийнах ёстой, Би.

⁹ Шарх нь эдгэршгүй бөгөөд Иудад хүрч иржээ. Энэ нь ард түмний минь үүд хаалганд, Бүр Иерусалимд хүрчээ.

¹⁰ Гатад үүнийг бүү хэл, огт бүү уйл. Бет-леафрад шороон дээр өнхөр.

¹¹ Шафирын оршин суугч аа, Шившигтэйгээр шалдан явж өнгөр. Заананы оршин суугч гарч ирэхгүй байна. Бет-езел гашуудаж, Чамаас хамгаалалтыг чинь авах болно.

¹² Иерусалимын гулдан хаалга уруу Гай гамшиг ЭЗЭНээс буусан учир Маротын оршин суугч сайны хүслэн болно.

¹³ Лахишийн оршин суугч аа, Морьдоо тэргэнд хөллөөрэй. Сионы охины нүгэл чамаас эхтэй юм. Учир нь Израилийн гэмт үйлдэл чамаас олдсон юм.

¹⁴ Тиймээс чи Морешет-гатад хагацлын бэлэг өгөгтүн. Ахзибын айлууд Израилийн хаадыг хуурах болно.

¹⁵ Марешагийн оршин суугч аа, Эзлэгчийг Би чам дээр авчирна. Израилийн алдар нь Адулламд ирэх болно.

¹⁶ Баяр баясгалан болох хүүхдийнхээ төлөө чи гашуудаж үсээ хяргаад халзан бол. Тэд чамаас салж, цөлөгдөх тул Бүргэд мэт бүр халзан бол.