Матай 15 - Ариун Библи 2013

Ахмадын заншил

¹ Тэгтэл Иерусалимаас фарисайчууд ба хуулийн багш нар Есүс дээр ирж —

² Яагаад Таны шавь нар ахмадын ёс заншлыг зөрчинө вэ? Тэд талх идэхдээ гараа угаахгүй юм гэцгээхэд

³ Тэр хариуд нь тэдэнд —Яагаад та нар бас ёс заншлынхаа төлөө Бурханы тушаалыг зөрчинө вэ?

⁴ Бурхан “Эцэг, эхээ хүндэл”, “Эцэг, эхээ хараагч нь үхэх ёстой” гэж айлдсан.

⁵ Гэтэл та нар “Хэн эцэгтээ эсвэл эхдээ «Танд хэрэг болох байсан зүйлээ би Бурханд өргөсөн» гэж хэлнэ,

⁶ тэр нь эцгээ эсвэл эхээ хүндлэх хэрэггүй” гэдэг. Та нар ийнхүү ёс заншлынхаа төлөө Бурханы үгийг хөсөрдүүлсэн.

⁷ Хоёр нүүртнүүд ээ, Исаиа та нарын тухай эш үзүүлэн, сайн онож хэлэхдээ

⁸ “Энэ ард түмэн Намайг уруулаараа л хүндэлдэг. Гэвч зүрх нь Надаас алс хол байдаг.

⁹ Тэд хүний тушаалыг сургаал мэт зааж, Харин Надад дэмий мөргөдөг” гэсэн гэв.

Бузарладаг зүйлс

¹⁰ Тэрээр хурсан олныг дуудаад, тэдэнд —Сонс бас ухаар.

¹¹ Аманд орсон юм хүнийг эс бузарлана. Харин амнаас гарч буй нь хүнийг бузарлана гэхэд

¹² шавь нар нь ойртож очоод, Түүнд —Энэ үгсийг тань сонсоод фарисайчууд бүдрэн унтууцсаныг Та мэдэв үү? гэжээ.

¹³ Харин Есүс хариуд нь —Тэнгэрлэг Эцэгийн минь тариагүй алив ургамал үндсээрээ сугалагдана.

¹⁴ Тэднийг орхи. Тэд сохруудын сохор удирдагчид юм. Сохор нь сохортоо газарчилбал хоёул нүхэнд унах болно гэхэд

¹⁵ Петр Түүнд —Энэ сургаалт зүйрлэлийг бидэнд тайлбарлаач гэсэнд

¹⁶ Тэр —Та нар ч бас ойлгохгүй хэвээр байна уу?

¹⁷ Амаар орох алив зүйл гэдсэнд ороод, жамаараа гадагш арилдгийг ойлгохгүй байна уу?

¹⁸ Харин амнаас гарах зүйлс нь зүрхнээс гарч, энэ нь хүнийг бузарладаг.

¹⁹ Зүрхнээс ёрын бодол, аллага, завхайрал, садарлал, хулгай, худал гэрчлэл, гүтгэлэг гардаг.

²⁰ Эдгээр нь хүнийг бузарладаг. Харин гараа угаалгүй идэх нь хүнийг эс бузарлана гэжээ.

Канаан эмэгтэйн итгэл

²¹ Есүс тэндээс явж, Тир, Сидон хавьд ирэв.

²² Үзэгтүн, нэгэн канаан эмэгтэй тэр мужаас ирж —Эзэн, Давидын Хүү, намайг өршөөгөөч. Охинд минь чөтгөр айхтар шүглэчихлээ гэж орилов.

²³ Харин Есүс түүнд нэг ч үг хариулсангүй. Тэгтэл шавь нар нь ирээд, Түүнээс —Түүнийг явуулаач. Тэр эмэгтэй араас маань орилсоор байна шүү дээ гэж гуйв.

²⁴ Гэтэл Есүс —Би зөвхөн Израилийн гэрийн алдагдсан хоньдод илгээгдсэн юм гэсэн

²⁵ боловч өнөөх эмэгтэй ирээд, Түүний өмнө мөргөж —Эзэн, надад туслаач гэхэд

²⁶ Есүс —Хүүхдүүдийн талхыг авч, нохдод хаях нь сайн биш ээ гэв.

²⁷ Харин тэр —Тийм ээ, Эзэн. Гэвч ноход ч эздийнхээ ширээнээс унасан үйрмэгийг иддэг шүү дээ гэсэнд

²⁸ Есүс —Эмэгтэй, итгэл чинь агуу юм. Хүссэнээр чинь болог гэхэд охин нь тэр цагт эдгэрчээ.

Олон хүнийг эдгээв

²⁹ Тэгээд Есүс тэндээс явж, Галил нуурын хавьд ирээд, ууланд гарч тэндээ суув.

³⁰ Маш олон хүн Түүн дээр доголон, тахир дутуу, сохор, хэлгүй бас өөр олон хүнийг авч ирээд хөлд нь тавилаа. Тэр тэднийг эдгээв.

³¹ Хэлгүйчүүд ярихыг, тахир дутуучууд эрүүл болохыг, доголонгууд явахыг, сохрууд харахыг хурсан олон үзээд гайхан, Израилийн Бурханыг алдаршуулав.

Дөрвөн мянган эрийг хооллов

³² Есүс шавь нараа дуудаад, тэдэнд —Би энэ хурсан олныг өрөвдөж байна. Учир нь тэд Надтай хамт гурван өдөр байж, ямар ч идэх юмгүй болжээ. Би тэднийг өлөн зэлмүүн явуулмааргүй байна. Тэд замдаа сульдаж унах вий гэхэд

³³ шавь нар нь Түүнд —Бид энэ зэлүүд газар ийм олон хүнийг цатгах талх хаанаас авах билээ? гэсэнд

³⁴ Есүс —Та нарт хэдэн талх байна? гэв. Тэд —Долоо, бас хэдэн жижиг загас байна гэлээ.

³⁵ Тэр хурсан олонд газар суухыг тушаагаад,

³⁶ долоон талх мөн загасыг авч талархал өргөн хувааж шавь нартаа өгөхөд шавь нар нь хурсан олонд тараан өгчээ.

³⁷ Бүгд идэж цадаад, үлдсэн цөвдлийг цуглуулахад долоон сагс дүүрэв.

³⁸ Эмэгтэйчүүд, хүүхдүүдээс гадна дөрвөн мянган эрс идсэн юм.

³⁹ Тэгээд хурсан олныг явуулаад, Тэр завинд сууж Магаданы нутагт ирэв.