Марк 11 - Ариун Библи 2013

Иерусалимд сүр жавхлантай орж ирлээ

¹ Тэд Иерусалимд, Чидун уулын ойролцоо Бетфаг болон Бетанд ойртон иржээ. Есүс шавь нараасаа хоёрыг илгээж

² тэдэнд —Эсрэг талд чинь байгаа тосгонд оч. Тэнд очоод та нар хүн ер унаж байгаагүй уяатай дудранг олно. Тайлаад энд авчир.

³ “Яагаад ингэж байна?” гэж хэн нэгэн та нарт хэлбэл “Эзэнд энэ хэрэгтэй байна. Даруй үүнийг чинь ийшээ явуулчихна” гээрэй гэв.

⁴ Тэд явж, гудамжинд үүдэнд уяатай дудранг олов. Тэгээд уяаг нь тайлж байтал

⁵ тэнд зогсож байгсдын зарим нь —Дудранг тайлж та нар яах гээв? гэхэд

⁶ тэд Есүсийн айлдсаны дагуу хэлсэнд тэднийг явуулав.

⁷ Тэд дудранг Есүст авчраад дээр нь дээлүүдээ тохож Есүсийг мордуулав.

⁸ Олон түмэн дээлээ зам дээр дэвсэж, зарим нь талбайгаас цавчсан найлзуурыг дэлгэжээ.

⁹ Өмнө хойно нь явагсад —Хосанна! Эзэний нэрээр Ирэгч нь ерөөлтэй еэ!

¹⁰ Эцэг Давидын маань Айсуй хаанчлал ерөөлтэй еэ! Хамгийн дээдэд Хосанна! гэж хашхиралдаж байлаа.

¹¹ Есүс Иерусалимд орж, сүмд очив. Эргэн тойрноо харахад, цаг хэдийнээ орой болсон тул Есүс арван хоёрынхоо хамт гарч Бетаныг зүглэв.

Инжрийн модыг хараав

¹² Маргааш нь тэднийг Бетанаас гарах үед Есүс өлсжээ.

¹³ Тэгээд навчирхаг инжрийн модыг холоос харж, модноос юм олж юу магад гээд явлаа. Тэр очоод, навчнаас өөр юу ч олсонгүй. Учир нь инжрийн цаг болоогүй байв.

¹⁴ Есүс тэр модонд —Чамаас хэн ч хэзээ ч дахиж жимс бүү идэг! гэв. Шавь нар нь сонсож байлаа.

Сүмийг цэвэрлэв

¹⁵ Тэд Иерусалимд ирцгээлээ. Есүс сүмд ороод, тэнд байсан худалдаачдыг болон худалдан авагсдыг хөөн гаргаж, мөнгө солигчдын ширээнүүд ба тагтаа худалдагсдын сандлыг хөмөрч орхив.

¹⁶ Сав суулга зөөж, сүмээр явахыг Тэрээр хэнд ч эс зөвшөөрөв.

¹⁷ Есүс тэдэнд заан, —“Миний гэр бүх үндэстний залбирлын гэр гэж нэрлэгдэх болно” гэж бичигдсэн бус уу? Гэтэл та нар түүнийг нь дээрэмчдийн үүр болгожээ гэв.

¹⁸ Ахлах тахилч нар ба хуулийн багш нар үүнийг сонсоод, Есүсийг хөнөөх арга зам хайж байлаа. Учир нь олон түмэн бүгд Түүний сургаалыг сонсоод гайхаж байсан тул тэд Есүсээс айж байв.

¹⁹ Орой болоход тэр хотоос гарч явдаг байлаа.

Хувхайрсан инжрийн модноос авах сургамж

²⁰ Өглөөгүүр тэр хавиар өнгөрөхдөө, нөгөө инжрийн мод үндэснээсээ хатсаныг тэд үзэв.

²¹ Петр санаж —Багш аа, хараач! Таны хараасан инжрийн мод хатчихаж гэхэд

²² Есүс тэдэнд хариулан —Бурханд итгэгтүн.

²³ Үнэнээр Би та нарт хэлье. Хэрэв та нар энэ ууланд “Дээш өргөгдөж тэнгист хаягд” гэж хэлэхдээ зүрхэндээ эргэлзэлгүй, харин хэлж байгаа чинь бүтнэ гэдэгт итгэвэл энэ нь биелэх болно.

²⁴ Тийм учир Би та нарт хэлье. Та нар юуны төлөө залбиран гуйна, түүнийгээ авсан гэдэгтээ итгэгтүн. Тэгвэл тэр чинь ёсоор болно.

²⁵ Та нар залбиран зогсохдоо хэрэв хэн нэгний эсрэг ямар нэгэн юм чамд байгаа бол уучил. Тэгвэл тэнгэр дэх Эцэг чинь мөн та нарын алдааг уучилна.

²⁶ [Харин та нар эс уучилбал тэнгэр дэх Эцэг чинь мөн та нарын алдааг үл уучилна гэв.]

Есүсийн эрх мэдлийг асуусан нь

²⁷ Тэд дахин Иерусалимд ирэв. Есүсийг сүм дотор явж байтал ахлах тахилчид, хуулийн багш нар болон ахлагчид хүрч ирээд,

²⁸ Түүнээс —Та ямар эрх мэдлээр эдгээрийг үйлдэнэ вэ? Эдгээрийг үйлдэх эрх мэдлийг хэн Танд өгөв? гэж асуухад

²⁹ Есүс тэдэнд —Би та нараас нэг зүйл асууя. Надад хариул. Тэгвэл Би ямар эрх мэдлээр эдгээрийг үйлдэж байгаагаа та нарт хэлье.

³⁰ Иоханы баптисм тэнгэрээс үү, эсвэл хүмүүсээс үү? Надад хариулаадах гэв.

³¹ Тэд дундаа эргэцүүлэн ярьж —Хэрэв бид “Тэнгэрээс” гэчихвэл Тэр “Тэгвэл та нар яагаад түүнд итгээгүй юм бэ?” гэнэ.

³² “Хүнээс” гэж хэлэлтэй нь биш гэцгээв. Бүгд л Иоханыг жинхэнэ эш үзүүлэгч гэж үздэг байсан тул тэд ард олноос айж байлаа.

³³ Тэгээд тэд Есүст —Бид мэдэхгүй гэж хариулахад нь Есүс —Би ч гэсэн ямар эрх мэдлээр эдгээрийг үйлддэгээ та нарт хэлэхгүй гэв.