Леви 1 - Ариун Библи 2013

Шатаалт тахил

¹ ЭЗЭН уулзалтын майхан дотроос Мосег дуудаж, түүнд айлдахдаа —

² Израилийн хөвгүүдтэй ярин “Та нараас хэн нэг нь ЭЗЭНд малаар өргөл өргөх бол бод, богийн сүргээсээ өргөл өргө.

³ Хэрэв түүний өргөл нь бод малын шатаалт тахил байх аваас тэрээр согоггүй эр малыг өргөх бөгөөд ЭЗЭНий өмнө хүлээн авагдахын төлөө уулзалтын майхны үүдэнд үүнийг өргөг.

⁴ Тэр хүн шатаалт тахилын толгой дээр гараа тавих бөгөөд энэ нь тэр хүний өмнөөс эвлэрүүлэл болж, хүлээн авагдана.

⁵ Тэр хүн ЭЗЭНий өмнө бяруу нядалж, Аароны тахилч хөвгүүд цусыг нь авчран уулзалтын майхны үүдэн дэх тахилын ширээг тойруулан цацна.

⁶ Тэрээр шатаалт тахилыг өвчиж, үүнийг эвдэг.

⁷ Тахилч Аароны хөвгүүд тахилын ширээн дээр гал өрдөж, гал дээр түлээ мод өрнө.

⁸ Аароны тахилч хөвгүүд бүх хэсгүүд, толгой, гадар өөхийг тахилын ширээн дээрх галын түлээн дээр өрж тавина.

⁹ Харин гэдэс дотор болон мөчүүдийг нь усаар угааг. Тахилч энэ бүхнийг тахилын ширээн дээр шатаах бөгөөд энэ нь ЭЗЭНд тааламжит үнэрт шатаалт тахил буюу галан тахил болой.

¹⁰ Хэрэв түүний өргөл нь бог малаас хонь эсвэл ямаан шатаалт тахил байх аваас тэрээр согоггүй эр малыг өргөг.

¹¹ Тэр үүнийг ЭЗЭНий өмнө, тахилын ширээний хойд талд нядлах бөгөөд Аароны тахилч хөвгүүд цусыг нь тахилын ширээг тойруулан цацна.

¹² Тэр үүнийг хэсэглэн эвдээд, толгой, гадар өөхийг нь тахилч тахилын ширээн дээрх галын түлээн дээр өрөх ажгуу.

¹³ Харин гэдэс дотор болон мөчүүдийг нь усаар угааг. Тахилч энэ бүхнийг тахилын ширээн дээр шатаах бөгөөд энэ нь ЭЗЭНд тааламжит үнэрт шатаалт тахил буюу галан тахил болой.

¹⁴ Хэрэв тэр хүний ЭЗЭНд өргөх өргөл шувуун шатаалт тахил байх аваас хүүрзгэнэ эсвэл өсвөр тагтааг өргөлдөө өргөг.

¹⁵ Тахилч үүнийг тахилын ширээнд авчирч, толгойг нь мушгин тахилын ширээн дээр шатаагаад цусыг нь тахилын ширээний хажуу уруу гоожуулна.

¹⁶ Бас түүний гүеэг өднийх нь хамт салган авч тахилын ширээний хажууд, зүүн тийш үнс уруу хаяг.

¹⁷ Түүнийг далавчийг нь ханзлахгүйгээр, хажуугаар нь хувааг. Тахилч үүнийг тахилын ширээн дээрх галын түлээн дээр шатаах бөгөөд энэ нь ЭЗЭНд тааламжит үнэрт шатаалт тахил буюу галан тахил болой.