Исаиа 38 - Ариун Библи 2013

Хезекиа өвдөв

¹ Тэр өдрүүдэд Хезекиа үхлүүт өвчтэй болов. Амозын хүү эш үзүүлэгч Исаиа түүн дээр ирээд, —ЭЗЭН айлдахдаа: “Гэрээ засагтун. Учир нь чи амьд үлдэхгүй, үхнэ” гэсэн гэв.

² Тэгэхэд Хезекиа нүүрээ хана уруу эргүүлэн ЭЗЭНд залбирч —

³ Аяа ЭЗЭН, би Танаас гуйя. Би Таны өмнө хэрхэн үнэнээр болон бүхий л зүрхээрээ явж, Таны мэлмийд сайныг үйлдэж байсныг одоо санаач гэж хэлээд цурхиран уйлав.

⁴ Тэгэхэд ЭЗЭНий үг Исаиад ирж, —

⁵ Явж, Хезекиад “Чиний өвөг эцэг Давидын Бурхан ЭЗЭН ийн айлдаж байна. «Би чиний залбирлыг сонсож, нулимсыг чинь харлаа. Үзэгтүн, Би чиний өдрүүд дээр арван таван жилийг нэмнэ.

⁶ Би чамайг болон энэ хотыг Ассирийн хааны гараас аварна. Би энэ хотыг хамгаална» гэсэн” гэж хэл!

⁷ ЭЗЭН амласнаа биелүүлнэ. ЭЗЭН энэ тэмдгийг чамд үзүүлнэ.

⁸ Үзэгтүн, Би Ахазын шатан дээгүүр өнгөрсөн нарны сүүдрийг арван алхмаар ухраана гэв. Тэгэхэд шатан дээгүүр өнгөрсөн нар арван алхмаар буцав.

⁹ Иудагийн хаан Хезекиа өвчлөөд илааршсаны нь дараах бичиг:

¹⁰ “Би амьдралынхаа дунд үед Үхэгсдийн орны үүд хаалгаар орж, Он жилүүдийнхээ үлдэгдлийг Алдах ёстой боллоо” гэж би хэлсэн.

¹¹ “Би амьдын газарт ЭЗЭНийг, ЭЗЭНийг харахгүй. Би ертөнцийн оршин суугчдын дунд Хүмүүнийг дахин харахгүй” гэж би хэлсэн.

¹² “Хоньчны майхан мэт Гэр орныг минь буулган авч надаас зайлуулав. Нэхмэлчин шиг би амьдралаа хуйлав. Тэр намайг нэхмэлийн сууринаас тастав. Өдрөөс шөнө болтол Та намайг дуусгавар болгоно.

¹³ Өглөө болтол би тэвчивч, Бүх ясыг минь Тэрээр арслан мэт хэмхчинэ. Өдрөөс шөнө болтол Та намайг дуусгавар болгоно.

¹⁴ Би хараацай мэт, тогоруу мэт орилон Тагтаа мэт гүнгэнэнэ. Эцсэн нүд минь өөдөө ширтэнэ. Эзэн, би шаналж байна. Хамгаалалт минь байгаач.

¹⁵ Тэрээр надад айлдан Өөрөө үүнийгээ үйлдсэн болохоор Би юу хэлэхсэн билээ? Сэтгэлийнхээ гашуудлаас болж Би бүх он жилүүддээ төлөв даруу явна.

¹⁶ Эзэн минь, Хүмүүс эдгээрээр амьдраг. Энэ бүхэнд сүнс минь бий. Та намайг эдгээж, амьдруулна.

¹⁷ Үзэгтүн, сайны төлөө би Гашуунаас гашуунаар зовсон. Амийг минь сүйрлийн нүхнээс Та хамгаалсан. Гэм нүгэл бүрийг минь Та нурууныхаа араар хаясан.

¹⁸ Учир нь Танд Үхэгсдийн орон талархаж чадахгүй, Үхэл Таныг магтаж чадахгүй. Нүхэнд орогчид нь Таны итгэмжит байдалд эс найдна.

¹⁹ Өнөөдөр миний үйлдэж байгаачлан Амьд буй нь Танд талархал өргөнө. Эцэг нь хөвгүүддээ Итгэмжит байдлыг чинь сургамжилна.

²⁰ ЭЗЭН намайг заавал аварна. Тэгээд амьдралынхаа бүх өдрүүдэд ЭЗЭНий өргөөнд бид чавхдаст хөгжмөөр тоглоно” гэжээ.

²¹ Тэгээд Исаиа —Тэд зүсэм инжир авч буглаат хатгин дээр нь тавивал тэр эдгэнэ гэж хэлэв.

²² Хезекиа —Би ЭЗЭНий өргөөнд очно гэсэн ямар тэмдэг байх вэ? гэв.