Исаиа 3 - Ариун Библи 2013

¹ Харагтун, Түг түмдийн БУРХАН Эзэн, Өөрийн хангамж, туслалцааг Иерусалим болон Иудагаас зайлуулах гэж байна. Талхны бүх хангамж, усны бүх хангамж,

² Хүчит эрс болон дайчид, шүүгчид ба эш үзүүлэгч, төлгөч ба ахлагч,

³ тавьтын ахлагч ба хүндэт хүн, зөвлөгч ба уран зураач бас чадварлаг илбэчдийг ч гэсэн зайлуулна.

⁴ Би нялх хөвгүүдийг тэдний ноёд болгож, Эрх хүүхдүүд тэднийг захирна.

⁵ Ард олон дарлагдаж, Хүн бүр нэг нь нөгөөгөө, хөршөө дарлаж, Залуус нь өвгөд уруугаа, Захирагдагсад нь хүндэт хүмүүс уруугаа дайрна.

⁶ Нэг хүн эцгийнхээ гэрт ахыгаа барьж авч “Чамд нөмрөг бий. Чи удирдагч маань бол. Энэ балгаснууд чиний гар дор орно” гэж хэлэхэд

⁷ Тэр өдөр өнөөх хүн дуугаа өндөрсгөн “Би эмч болохгүй. Манай гэрт талх ч байхгүй, нөмрөг ч байхгүй. Тиймээс намайг ард түмний удирдагчаар томилох ёсгүй” гэх болно.

⁸ Юу гэвэл, Иерусалим бүдэрч, Иуда уналаа. Учир нь хэл болон үйлс нь ЭЗЭНий эсрэг байж, Сүр жавхлант оршихуйнх нь эсрэг тэрсэлжээ.

⁹ Тэдний царайны хувирал Өөрсдийнх нь эсрэг гэрчилдэг. Тэд Содомын адилаар нүглээ дэлгэн үзүүлдэг. Өөрсдийнхөө дээр ёр мууг авчирсан тэд золгүй еэ!

¹⁰ Сайн сайхан түүнтэй хамт байна гэдгийг Зөв хүмүүст хэлэгтүн. Учир нь тэд үйлдлийнхээ Үр жимсийг идэх болно.

¹¹ Гэм буруутнууд золгүй еэ! Муу муухай нь түүнтэй хамт байх болно. Учир нь тэрээр хүртэх ёстойгоо хүртэх болно.

¹² Ард түмэн минь! Хүүхдүүд тэднийг дарлаж, Эмэгтэйчүүд тэднийг захирдаг. Ард түмэн минь, Та нарыг дагуулагчид та нарыг төөрүүлж, Замыг чинь будлиулж байна.

¹³ ЭЗЭН зарга мэдүүлэхээр босож, Хүмүүсийг шүүхээр зогслоо.

¹⁴ Ард түмнийхээ ахлагчид бас ноёдтой хамт ЭЗЭН шүүхэд орж байна. “Усан үзмийн талбайг та нар цөлмөсөн. Ядуусаас дээрэмдсэн олз чинь гэрт тань бий.

¹⁵ Ард түмнийг минь дарлаж, Ядуусын нүүрийг түлнэ гэдэг чинь юу гэсэн үг вэ?” гэж Түг түмдийн БУРХАН Эзэн айлдаж байна.

¹⁶ ЭЗЭН ийнхүү айлдав. “Сионы охид бардам учраас толгойгоо өргөөд Өдсөн харцаар ширтэн алхаж, Хөл дэх гархиа хүртэл жингэнүүлэн Ихэмсгээр алхалж байна.

¹⁷ Ийм учраас Эзэн Сионы охидын хуйхыг нь яршуулан зовооно. ЭЗЭН магнайг нь нүцгэлнэ”.

¹⁸ Тэр өдөр Эзэн, хөл дэх гархи, толгойн зүүлт, саран хэлбэрт чимэглэл,

¹⁹ ээмэг, бугуйвч, гивлүүр,

²⁰ малгай, хөлийн гинж, бүс, сүрчигний хайрцаг, сахиус,

²¹ хурууны бөгж, хамрын гархи,

²² ёслолын хувцас, гадуур цамц, нөмрөг, мөнгөний түрийвч,

²³ толь, дотуур хувцас, алчуур, гивлүүр зэргийг бүгдийг нь авч хаяна.

²⁴ Анхилуун сүрчиг нь өмхий ус, Бүс нь олс, гоёмсог зассан үс нь халцарсан хуйх, Сайхан хувцас нь тааран өмсгөл болж Үзэсгэлэн гоог ичгүүрийн тамга орлоно.

²⁵ Танай эрчүүд илдэнд, Танай хүчтэнүүд дайнд унана.

²⁶ Үүдэн хаалга нь гашуудан уйлж, Хаягдсан тэрээр газар дээр сууна.