Исаиа 15 - Ариун Библи 2013

Моабын тухай зөн

¹ Моабын тухай зөн. Моабын Аар шөнөөр устгагдан сүйрч, Моабын Кир шөнөөр устгагдан сүйрчээ.

² Тэд гашуудан уйлахаар сүм, Дибон өөд, мөргөлийн өндөрлөгүүд өөд гарав. Небо болон Медебагийн төлөө Моаб уйлав. Хүн бүрийн толгой нь халзан агаад сахлаа хусжээ.

³ Тэд гудамжиндаа таар углацгааж, Дээвэр болон талбай дээрээ бүгд орилолдож, Нулимс унагана.

⁴ Хешбон, Елеале мөн уйлж, Дуу нь Иахаз хүртэл сонсогдоно. Тиймээс Моабын зэвсэглэсэн эрс чангаар уйлалдан Аминыхаа төлөө чичирнэ.

⁵ Моабын төлөө зүрх минь хашхирна. Оргодлууд нь Зоар, Еглат-шелишиа хүртэл зугтана. Тэд Лухитын бэлээр уйлалдан өгсөж, Сүйрэл мөхөлдөө гашуудан Хоронаимын зам дээр шаналах уйлаан нь өндөрсөнө.

⁶ Нимримийн ус ширгэн өвс нь гандаж, Ургамал ногоо үхэж, Ногоон юм үгүй болов.

⁷ Иймээс тэд илүүчилж, Нөөцөлсөн баялгаа Арабимын гол уруу зөөнө.

⁸ Тэдний шаналалт дуу Моабын нутгийн эргэн тойронд цуурайтаж, Орилоон нь Еглаимд, бүр Беер-елимд ч хүрсэн.

⁹ Учир нь Димоны ус цусаар дүүрэв. Би Димонд уй гашууг нь нэмж, Моабын оргодлууд ба тэр газарт үлдэгсэд дээр арслан авчирна.