Иов 41 - Ариун Библи 2013

¹ Левиатаныг чи загасны дэгээгээр барьж чадах уу? Олсоор хэлийг нь хүлж боож чадах уу?

² Хамрыг нь чи оосроор дөрлөж чадах уу? Эсвэл эрүүг нь дэгээ төмрөөр цоолж чадах уу?

³ Тэр чамаас олонтаа гуйж гувших уу? Дөлгөөн зөөлөн үгсийг чамд хэлэх үү?

⁴ Чамтай тэр гэрээ байгуулах уу? Чи түүнийг үүрд боолоо болгох уу?

⁵ Шувуухайгаар наадах адил чи түүгээр тоглон наадах уу? Шивэгчингүүдэд үзүүлэхээр чи түүнийг хүлэх үү?

⁶ Хамтран худалдаачид түүнийг борлуулах уу? Арилжаачид наймаачдад түүнийг огтлон хуваах уу?

⁷ Арьсыг нь жалангаар цоолж чадах уу? Толгойг нь загасчны сэрээгээр сүлбэж чадах уу?

⁸ Түүн дээр гараа тавигтун. Тулалдааныг сана. Чи дахин ингэхгүй!

⁹ Харагтун, горьдлого чинь хуурамч юм. Харцнаас нь ч хүртэл чи доош хаягдах уу?

¹⁰ Хэрцгий түүнийг өдөөх хэн ч үгүй. Харин Миний өмнөөс зогсож чадах хэн байгаа юм бэ?

¹¹ Би буцааж төлөхийн тулд хэн Надад өгсөн юм бэ? Бүхий л тэнгэрийн доорх нь Минийх юм.

¹² Түүний эрхтнүүд, тэнхээ чадал, Төгс сайхан галбирынх нь тухай Би дуугүй байхгүй.

¹³ Гадуур өмсгөлийг нь хэн хуулж чадах вэ? Давхар хуягийг нь хэн нэвтэлж чадах вэ?

¹⁴ Нүүр амыг нь нээж хэн чадах вэ? Тойрон буй шүд нь аймшигтай аж.

¹⁵ Нуруу нь бат бөх хуяг бөгөөд Нэг ч завсаргүй холбогдсон лац мэт буюу.

¹⁶ Нэг нь нөгөөтэйгөө үнэхээр ойрхон тул Нөгөөгийнх нь хооронд агаар ч орох боломжгүй.

¹⁷ Тэд өөр хоорондоо холбоостой. Тэгээд нэгнээсээ зууралдан огт салдаггүй.

¹⁸ Найтаах үед нь гэрэл цацардаг, Нүд нь үүрийн туяа адил бөлгөө.

¹⁹ Амнаас нь шатаж буй бамбарууд гардаг, Галын очис үсчдэг.

²⁰ Хамрынх нь нүхнээс утаа гарч байгаа нь Халуун, буцлам тогоо мэт буюу

²¹ Амьсгал нь нүүрсийг асаадаг бөгөөд амнаас нь галын дөл гардаг.

²² Хүзүү нь хүч чадлаар тогтдог бөгөөд Хүйдэс айдас ч өмнө нь цовхчдог.

²³ Махбодынх нь хэсгүүд нягт холбогдсон агаад маш бат бөх, хөдөлшгүй тогтдог.

²⁴ Түүний зүрх чулуу мэт хатуу, тээрмийн суурь чулуу мэт хатуу.

²⁵ Түүнийг босоход хүчтэнүүд сүрдэж айснаасаа болж тэд зугтана.

²⁶ Ямар ч илд, жад, өдтэй сум болон хуяг ч түүнд ч нэмэргүй ажээ.

²⁷ Тэрээр төмрийг сүрэл мэт үзэж, хүрлийг ялзарсан мод мэт тооцдог.

²⁸ Нум сум харвахад ч тэр зугтдаггүй. Нэгэнт дүүгүүрдсэн чулуунууд түүний хувьд сүрэл болдог.

²⁹ Шийдмүүдийг ч сүрэл мэт тооцдог. Сүнгэнэх жаданд ч тэр инээдэг.

³⁰ Доод тал нь ваарын хурц хэлтэрхийнүүд мэт агаад шавран дээр хайрсны мөр үлдээн мөлхдөг.

³¹ Тэрээр гүн усыг тогоо мэт буцалгаж, Тэнгис далайг тостой тогоо мэт бургилуулдаг.

³² Араасаа тэр гялбах мөр үлдээдэг бөгөөд Оёоргүй гүн ч бууралтсан мэт болдог.

³³ Айдас түгшүүргүйгээр бүтээгдсэн түүнтэй Адил нэгэн газар дэлхий дээр хаана ч алга.

³⁴ Бүхнийг өндөр дээрээс хардаг Бардамналын хамаг хөвгүүдийн хаан нь билээ гэж айлдав.