Иов 32 - Ариун Библи 2013

Иовын нөхдийг Елиху зэмлэв

¹ Ингээд Иов өөрийн нүдэнд зөвт байсан тул өнөөх гурван хүн түүнд хариу өчихөө больжээ.

² Тэгтэл Рамын ургийн, буз хүн Барахелын хүү Елиху гэгч байв. Иов өөрийгөө Бурханы өмнө зөвтгөсөн тул Елихугийн уур түүний эсрэг шатсан юм.

³ Түүнчлэн Иовын гурван нөхөр түүнийг буруутгасан хэдий ч хариулах зүйл олж чадаагүй тул Елихугийн уур мөн тэдний эсрэг шатав.

⁴ Тэд өөрөөс нь насаар ахмад байсан тул Елиху, Иовтой ярилцахаа хүлээзнэж байв.

⁵ Тэгээд өнөөх гурван хүний аманд хариу байхгүйг Елиху хараад түүний уур шатжээ.

⁶ Тиймээс буз хүн Барахелын хүү Елиху өгүүлрүүн: —Би насаар залуу, та нар ахмад билээ. Тиймээс ч би зүрхшээж, та нарт бодолоо хэлэхээс хулчийж байлаа.

⁷ Тэгээд би “Олон өдөр элээсэн нь ярьж, Он жилүүд нь тэдэнд мэргэн ухааныг мэдүүлдэг” гэж бодож байлаа.

⁸ Тэгтэл хүний доторх сүнс болон Төгс Хүчит Нэгэний амьсгал л тэдэнд ойлгуулдаг аж.

⁹ Агуу хүмүүс мэргэн байх ёсгүй бөгөөд Ахмадууд ч шударга шүүлтийг ухаарах албагүй юм байна.

¹⁰ Иймд би “Намайг сонс. Би ч гэсэн бодол санаагаа хэлье” гэлээ.

¹¹ Харагтун, би үгийг тань хүлээж, Хэлэх үгээ эргэцүүлэх зуурт тань Цэцэн мэргэн тайлбаруудыг тань сонслоо.

¹² Тийм ээ, та нарыг би маш хянуур ажиглалаа. Үзэгтүн, Иовыг няцаасан хэн ч байгаагүй бөгөөд Үгэнд нь хариулсан хэн ч байгаагүй юм.

¹³ Гэсэн ч “Мэргэн ухааныг бид оллоо. Хүн биш, Бурхан л түүнийг цохиг” гэж бүү хэл.

¹⁴ Тэр миний эсрэг үгээ чиглүүлээгүй бөгөөд Тиймээс би ч та нарын үгсээр тань түүнд хариулахгүй.

¹⁵ Тэд айн шантарцгаасан, тэд хариулах ч үгүй байна. Хэлэх үгс нь ч барагдлаа.

¹⁶ Тэд ярихгүй, тэндээ зогсоод дахин хариулахгүй учраас би хүлээх ёстой юм уу?

¹⁷ Тэгэхлээр би ч мөн өөрийн хувьд хариулж, Төрсөн санаа бодолоо хэлэх болно.

¹⁸ Хэлэх үгсээр дүүрэн байна, би Хэвэл доторх сүнс шахамдуулж байна, намайг.

¹⁹ Харагтун, хэвлий гэдэс минь бөглөөгүй дарс мэт, Хариугүй, шинэ тулам адил дэлбэрэх гэж байна.

²⁰ Тайтгарахын тулд би ярих ёстой Уруулаа нээж, би хариу хэлье.

²¹ Хэнд ч би тал тохой татахгүй, бялдуучлахгүй.

²² Хэрхэн бялдуучлахыг би хэзээнээс мэдэхгүй ээ. Эс бөгөөс Бүтээгч минь намайг үтэр түргэн зайлуулах байсан.