Ефес 5 - Ариун Библи 2013

¹ Иймд хайрлагдсан хүүхдүүдийн хувьд Бурханыг дуурайгчид бай.

² Христ та нарыг хайрласан бөгөөд Өөрийгөө бидний төлөө Бурханд анхилуун үнэрт өргөл ба тахил болгон өргөсний адил хайр дор яв.

Булай замаас татгалзах нь

³ Харин ариун хүмүүст үл нийцэх аливаа садар самуун, бузар булай, шунал нь та нарын дунд бүү дурдагдаг.

⁴ Садар булай, шалиг балай эсвэл самуун балиар яриа нь зохимжгүй. Харин оронд нь талархалаа өргө.

⁵ Садарлагч, бузрыг үйлдэгч, шунахайрагч тухайлбал шүтээн шүтэгч аливаа хүнд Христийн болон Бурханы хаанчлалд өв байхгүй гэдгийг та нар мэд.

⁶ Хэн ч та нарыг хоосон үгсээрээ бүү мэхлэг. Учир нь эдгээрээс болж Бурханы уур хилэн дуулгаваргүй хөвгүүд дээр буудаг юм.

⁷ Иймд тэдний хамсаатан бүү бай.

⁸ Урьд нь харанхуй байсан та нар өдгөө Эзэн дотор гэрэл тул гэрлийн хүүхдүүд ёсоор яв.

⁹ Бүх сайн, зөвт байдал ба үнэнд гэрлийн үр жимс байна.

¹⁰ Ингэхдээ Эзэнд таалагдах юмыг ол.

¹¹ Харанхуйн, үр жимсгүй ажлуудад бүү оролц, харин ч тэдгээрийг илчил.

¹² Учир нь тэдний нууцаар үйлдсэн зүйлсийг ярихад ч ичмээр юм.

¹³ Харин бүх зүйл гэрлээр илчлэгдэхдээ харагддаг.

¹⁴ Учир нь харагддаг аливаа зүйл нь гэрэл юм. Тиймд “Нойрсогч оо, сэр. Үхэгсдээс бос. Христ чиний дээр гэрэлтэх болно” гэдэг.

¹⁵ Тиймээс та нар мэргэн бусчууд шиг биш, мэргэн хүмүүсийн ёсоор, хэрхэн алхаж буйгаа хянаж бай.

¹⁶ Өдөр хоног цөвүүн тул цагийг үнэл.

¹⁷ Тиймээс бүү мунхаг бай. Харин Эзэний хүсэл юу болохыг ухаар.

¹⁸ Дарсанд бүү согтуур. Эс бөгөөс хэт самуурал буй. Харин Сүнсээр дүүр. Ингэхдээ

¹⁹ дуулал, магтуу ба сүнслэг дуунуудаар өөр хоорондоо ярилцаж, Эзэнд хандаж зүрхэндээ дуулж, ая дуу зохиож,

²⁰ Бурхан ба Эцэгт бүхний төлөө бидний Эзэн Есүс Христийн нэрээр үргэлж талархал өргө.

Христэч гэр бүл

²¹ Христээс эмээн нэг нь нөгөөдөө захирагд.

²² Эхнэрүүд ээ, Эзэнд адил нөхрүүддээ захирагд.

²³ Учир нь Христ чуулганы тэргүүн байдгийн адил нөхөр нь эхнэрийнхээ тэргүүн юм. Христ Өөрөө тэр биеийн Аврагч мөн.

²⁴ Чуулган Христэд захирагддагийн адил түүнчлэн эхнэрүүд нөхрүүддээ бүх талаар захирагд.

²⁵ Нөхрүүд ээ, Христ чуулганыг хайрлаад түүний төлөө Өөрийгөө өгсний адил эхнэрүүдээ хайрла.

²⁶ Тэр чуулганыг үгээр дамжуулан усанд угааж цэвэрлэн, ариусгаад

²⁷ түүнийг ямар ч толбо, үрчлээсгүй эсвэл алив ийм юмгүй, харин ариун, гэм зэмгүй байлган Өөрийнхөө өмнө алдарт чуулган болгох гэсэн билээ.

²⁸ Тиймээс нөхрүүд ч эхнэрүүдээ өөрийн бие адил хайрлах ёстой. Эхнэрээ хайрлагч нь өөрийгөө хайрладаг.

²⁹ Учир нь хэн ч хэзээ ч өөрийн махбодыг үзэн яддаггүй, харин ч тэжээж, халамжилдаг. Христ мөн чуулганд ийнхүү ханддаг.

³⁰ Учир нь бид Түүний биеийн эрхтнүүд юм.

³¹ “Тиймээс эр хүн эцэг эхээ орхин, эхнэртэйгээ нийлж, хоёул нэг махбод болно.”

³² Энэ нууц нь агуу юм. Гэвч би Христ ба чуулганы тухайд ярьж байна.

³³ Гэхдээ хэн чинь ч өөрийгөө хайрладгийн адил эхнэрээ хайрла. Эхнэр нь нөхрөөсөө эмээж бай.