Дуулал 99 - Ариун Библи 2013

Бурханы ариуныг магтахуй

¹ ЭЗЭН захирдаг. Ард түмэн чичрэгтүн! Тэрээр херубуудын дээр заларна. Газар дэлхий ганхагтун!

² ЭЗЭН Сионд аугаа бөгөөд Бүх ард түмний дээр өргөмжлөгдсөн.

³ Таны аугаа, сүрдмээр нэрийг Тэд магтан дуулаг. Тэр ариун.

⁴ Хүч чадлын Хаан, Шударгыг хайрлагч Та Чигч шударгыг батжуулсан. Та Иаковт шүүлт ба зөвт байдлыг гүйцэлдүүлсэн.

⁵ Бидний Бурхан ЭЗЭНийг өргөмжилж, Түүний хөлийн гишгүүрийн өмнө мөргөгтүн! Тэр ариун.

⁶ Мосе, Аарон нар Түүний тахилч нарын дунд, Мөн Самуел Түүний нэрийг дуудагчдын дунд байсан. Тэд ЭЗЭНийг дуудсанд Тэрээр тэдэнд хариулсан.

⁷ Тэр тэдэнд үүлэн багананаас айлдсан Тэд Түүний өгсөн гэрчлэл ба зарлигийг сахин биелүүлсэн.

⁸ Бидний Бурхан ЭЗЭН, Та тэдэнд хариулсан. Та тэднийг уучилдаг Бурхан, Мөн тэдний үйлдэлд өшөө авагч байсан.

⁹ Бидний Бурхан ЭЗЭНийг өргөмжилж, Түүний ариун ууланд мөргөгтүн! Учир нь Бурхан ЭЗЭН маань ариун.