Дуулал 82 - Ариун Библи 2013

Шударгыг хүсэмжилсэн гуйлт

Асафын дуулал.

¹ Тэнгэрлэг чуулалд Бурхан байраа эзэлж, Тэрээр бурхдын дунд шүүж байна.

² Хэдий болтол та нар шударга бусаар шүүж, Буруутад нүүр тал засна вэ? Села

³ Дорой хийгээд эцэггүй хүмүүсийг өмгөөл, Зовогсод хийгээд гачигдагсдыг зөвтгө.

⁴ Дорой болон гачигдагсдыг авар. Тэднийг буруутны гараас чөлөөл.

⁵ Мэддэг ч үгүй, ойлгодог ч үгүй Харанхуйд явцгаадаг, тэд. Дэлхийн бүх үндэс сууриуд ганхжээ.

⁶ Би “Бурхад билээ, та нар. Бүгд Хамгийн Дээдийн хөвгүүд юм.

⁷ Гэсэн ч та нар хүн шиг үхэж, Ноёдын нэгтэй шиг унах болно” гэв.

⁸ Бурхан, босоод дэлхийг шүүгээч! Учир нь бүх үндэстнийг эзэмшигч нь Та юм.