Дуулал 8 - Ариун Библи 2013

Тэнгэрлэг суу ба хүмүүн зиндаа

Удирдаачид. Давидын дуулал, гит дээр.

¹ ЭЗЭН, бидний Эзэн, Таны нэр бүх газар дэлхийд Юутай суу алдартай вэ! Та цог жавхлангаа тэнгэрсийн дээгүүр байрлуулсан билээ.

² Өстнүүдээсээ болж Хөхүүл хүүхдүүд, нялхсын амаар Хүч чадлыг Та бататгасан нь Дайсан ба хонзогногчийг Дуугүй байлгахын тулд болой.

³ Таны мутрын бүтээл тэнгэрсийг, Таны цогцлоон байгуулсан сар, оддыг Би тунгаан бодму.

⁴ Хүн гэгч юу болоод Та түүнд санаа тавьж, Хүмүүн гэгч юу болоод Та түүнийг анхаарна вэ?

⁵ Та түүнийг Бурханаас арай доохно болгожээ, Алдар хүндийн титмийг түүнд өмсгөжээ.

⁶ Та түүнд мутрынхаа бүтээлүүдийг захируулдаг. Та бүх юмсыг түүний хөл дор тавьсан нь

⁷ Хонь үхэр бүгд, Мөн хээрийн араатан амьтад,

⁸ Тэнгэрийн шувууд болон далайн загас Усан замаар сэлэгч бүхэн юм.

⁹ ЭЗЭН, бидний Эзэн, Таны нэр бүх газар дэлхийд Юутай суу алдартай вэ!