Дуулал 75 - Ариун Библи 2013

Бурханы гайхамшигт үйлсэд талархахуй

Удирдаачид: Бүү устгаач аялгуунд. Асафын дуулал. Дуу.

¹ Бид Танд талархал өргөж байна, Бурхан, бид талархал өргөж байна Учир нь Таны нэр ойрхон Таны гайхамшигт үйлс тунхаглагдаж байна.

² Би тогтоосон цагийг сонгохдоо Чигч шударгаар шүүх билээ.

³ Дэлхий болон тэнд оршин суугч Бүгд ганхана. Баганануудыг нь Би Бат тогтоожээ. Села

⁴ Бардамнагчдад Би “Бүү бардамна” Буруутуудад “Эврээ бүү өргө.

⁵ Эврээ өндөрт бүү өргө. Бүдүүн хүзүүгээр бүү ярь” гэв.

⁶ Учир нь өргөмжлөл Дорноос ч үгүй, өрнөөс ч үгүй, Цөлөөс ч үл ирнэ.

⁷ Харин Бурхан Шүүгч бөгөөд Нэгийг бууруулж, нөгөөг өргөмжилнө.

⁸ Сайн хутгасан бөгөөд хөөсөрч буй дарстай аяга ЭЗЭНий мутарт байна. Тэрээр түүний дотроос цутгаж байна. Дэлхийн бүх гэм буруутнууд Шавхрууг нь шавхан уух болой.

⁹ Харин би мөнхөд тунхаглана. Иаковын Бурханд би магтан дуулна.

¹⁰ Буруутын бүх эвэр таслагдана Зөвтийн эврүүд өндөрт өргөгдөнө.