Дуулал 64 - Ариун Библи 2013

Хамгаалалтын залбирал

Удирдаачид: Давидын дуулал.

¹ Бурхан, гомдлын минь дууг сонсооч Дайсны аймшгаас амийг минь хамгаалаач!

² Намайг муу хүмүүсийн нууц чуулал, Ёс бусыг үйлдэгчдийн Үймээн шуугианаас нуугаач!

³ Хэл юугаа илд мэт ирлэсэн нь Хорон үгсээ сум мэт тэд онилсон нь

⁴ Өөлөх өөгүйг далдхан газраас харвахын тулд юм. Тэд түүнийг гэнэтхэн харваад эмээх ч үгүй.

⁵ Тэд ёрын зүйлдээ биенээ өөгшүүлэн Нууцаар урхи тавих тухай ярилцана. Тэд “Хэн тэднийг харах юм бэ?” гэцгээнэ.

⁶ “Гүйцэд боловсруулсан хуйвалдааныг Бид дуусгалаа” гэж хэлэн Муу хэргийг тэд сэднэ. Учир нь хүний доторх бодол Зүрх сэтгэлийг ойлгож болохгүй билээ.

⁷ Харин Бурхан тэднийг сумаар харван Тэд гэнэтхэн шархадна

⁸ Ингээд тэд түүнийг бүдрүүлнэ. Өөрсдийнх нь хэл өөрсдийнх нь эсрэг болно. Тэднийг харагчид бүгд толгой сэгсэрнэ.

⁹ Тэгээд бүх хүн эмээж, Бурханы ажлыг тунхаглан Үйлдсэнийг нь тунгаан бодох болно.

¹⁰ Зөвт хүн ЭЗЭНий дотор баярлаж, Түүний дотор хоргодно. Зүрх шударга бүхэн бахархан бахдана.