Дуулал 61 - Ариун Библи 2013

Бурханы хамгаалалтын баталгаа

Удирдаачид: Чавхдаст хөгжимд. Давидын дуулал.

¹ Хашхирахыг минь сонсооч, Бурхан, Залбиралд минь чих тавиач.

² Зүрхээ цөхрөн доройтоход Газар дэлхийн хязгаараас би Таныг дуудаж байна. Надаас өндөр хад уруу Намайг хөтлөн гаргаач.

³ Учир нь Та надад Хоргодох газар, Дайсны урдах бат бэх цамхаг билээ.

⁴ Би майханд тань мөнхөд амьдрахсан. Таны жигүүрийн сүүдэр дор хоргодохсон. Села

⁵ Бурхан, Та тангаргуудыг минь сонссон билээ. Нэрээс тань эмээгчдийн өвийг Та надад өгсөн.

⁶ Та хааны өдрүүд дээр өдрүүд нэмж, Он жилүүдийг нь үеийн үед үргэлжлүүлэх болтугай.

⁷ Тэрээр Бурханы өмнө мөнхөд амьдарна. Түүнийг хамгаалуулахаар Энэрэл хайр ба үнэнийг томилооч.

⁸ Тийнхүү өдөр өдрөөр ам өчгөө төлсөөр Би Таны нэрийг мөнхөд магтан дуулна.