Дуулал 6 - Ариун Библи 2013

Үхлүүт өвчнөөс эдгэхийн төлөө залбирал

Удирдаачид. Давидын дуулал, чавхдаст хөгжимд. Шеминитийн дагуу.

¹ ЭЗЭН, уураараа намайг бүү зэмлээч. Хилэнгээрээ намайг бүү гэсгээгээч.

² Сул доройгийн минь учир ЭЗЭН, намайг өршөөгөөч. Яс минь янгинахын учир ЭЗЭН, намайг эдгээгээч.

³ Сэтгэл минь ихэд шанална. ЭЗЭН минь, гэвч Та хэр удах вэ?

⁴ ЭЗЭН, эргэн ирж, сэтгэлийг минь хэлтрүүлээч. Энэрэл хайрынхаа учир намайг авраач.

⁵ Үхдэл нь Таныг үл дурсана. Үхэгсдийн оронд хэн Танд талархах вэ?

⁶ Ёололдоо би туйлдав. Хайлалдаа ор минь шөнө бүр живнэм. Нулимсанд нэвчив, дэвсгэр минь.

⁷ Гашуудлаас болж нүдний минь гал бөхөв. Өстнүүдээсээ болж нүд минь харанхуйлав.

⁸ Ёс бусыг үйлдэгчид та бүгд надаас холд Учир нь ЭЗЭН миний уйлан гингэнэх дууг сонсов.

⁹ ЭЗЭН миний гуйлтыг сонссон бөгөөд ЭЗЭН миний залбирлыг хүлээн авдаг.

¹⁰ Миний бүх дайсан ичгүүрт орж, ихэд зүрхшээнэ. Тэд гэнэт ичиж, ухрах болно.