Дуулал 47 - Ариун Библи 2013

Бурханы захиргаа

Удирдаачид. Корагийн хөвгүүдээс. Дуулал.

¹ Хүмүүс ээ, бүгд алгаа таш. Уухайн дуугаар Бурханд хашхирагтун.

² Учир нь Хамгийн Дээд ЭЗЭН Аймшигтай бөгөөд Бүх дэлхийн аугаа Хаан юм.

³ Тэр бидний дор ард түмнүүдийг, Хөл дор маань улс үндэстнүүдийг оруулсан.

⁴ Өөрийн хайрласан Иаковын сүр жавхлан болох Өвийг маань Тэр бидэнд сонгосон. Села

⁵ Бурхан хашхирах дуунд, Бүрээн дуун дунд ЭЗЭН дээш залрав.

⁶ Магтан дуулагтун, Бурханыг магтан дуулагтун. Магтан дуулагтун, Бидний Хааныг магтан дуулагтун.

⁷ Бурхан бүх дэлхийн Хаан тул Яруу сайхан дууллаар магтан дуулагтун.

⁸ Бурхан улс үндэстнүүдийг захиран Ариун сэнтийдээ залардаг.

⁹ Улс үндэстнүүдийн ноёд Абрахамын Бурханы ард түмэнтэй хамт цугларчээ. Учир нь дэлхийн бамбайнууд Бурханых Тэр үлэмж ихээр өргөмжлөгдсөн.