Дуулал 28 - Ариун Библи 2013

Тусламж эрсэн залбирал ба талархал

Давидын дуулал.

¹ ЭЗЭН, Тан уруу би хашхирнам, Хад минь, намайг сонсохоос Бүү татгалзаач! Хэрэв Та дуугүй байвал Нүхэнд ойчих хүмүүсийн адил болно, би.

² Би Тан уруу тусламж гуйн хашхирах аваас, Би гараа Таны ариун газар өөд өргөх аваас Гуйлтын минь дууг сонсооч!

³ Буруутууд хийгээд ёс бусыг үйлдэгчидтэй хамт Намайг бүү чирэн аваачаач! Тэд хөршүүдтэйгээ эвтэй ярих авч Зүрхэнд нь бузар муу байх ажгуу.

⁴ Тэдний үйлдэл хийгээд Үйлдлийнх нь цөвийн дагуу тэдэнд өгөөч, Гарынх нь бүтээлийн дагуу Тэдэнд өгөөч, Авбал зохих зүйлсээр нь Тэдэнд хариулаач!

⁵ Тэд ЭЗЭНий үйл хэргүүд хийгээд Гарынх нь бүтээлүүдийг ойшоодоггүй тул Тэр тэднийг устгана. Тэднийг дахин босгохгүй.

⁶ ЭЗЭН магтагдах болтугай. Учир нь Тэр гуйх дууг минь сонссон билээ.

⁷ ЭЗЭН миний хүч чадал, миний бамбай. Зүрх минь Түүнд найдсан билээ, Тусыг нь би хүртсэн билээ. Тиймээс зүрх минь баярлаж, Түүнд дуугаараа би талархнам.

⁸ ЭЗЭН бол Өөрийнхөө хүмүүсийн хүч чадал, Тэрээр Өөрийнхөө тосолсон хүмүүсийн авралын хамгаалалт буюу.

⁹ Хүмүүсээ аварч, Өвөө ерөөгөөч! Тэднийхээ хоньчин нь болж, Мөнхөд тэднийгээ үүрээч!