Дуулал 20 - Ариун Библи 2013

Ялалтын залбирал

Удирдаачид. Давидын дуулал.

¹ Зовлон шаналангийн өдөр ЭЗЭН чамд хариулаг! Иаковын Бурханы нэр Чамайг хамгаалаг!

² Тэр чамд ариун газраас тусламжийг илгээж, Сионоос чамайг түших болтугай!

³ Тэрээр бүх идээн өргөлийг чинь санаж, Шатаалт тахилыг чинь хүлээн авах болтугай! Села

⁴ Тэр чамд зүрхний чинь хүслийг хүртээж, Чиний бүх зорилго төлөвлөгөөг биелүүлэх болтугай!

⁵ Бид ялалтад чинь баярлан дуулж, Бурханыхаа нэрээр бид тугаа мандуулах болно. ЭЗЭН бүх гуйлтыг чинь Биелүүлэх болтугай!

⁶ ЭЗЭН тослогдогчоо авардаг гэдгийг Одоо би мэднэ. Тэр баруун гарынхаа аврах хүчээр, Ариун тэнгэрээсээ түүнд хариулах болно.

⁷ Зарим нь тэргэнд, зарим нь моринд найддаг. Харин бид өөрсдийн Бурхан ЭЗЭНий нэрийг санах болно.

⁸ Тэд бөхийн унацгаасан, Харин бид босоцгоож, Цэх шулуун зогсоцгоосон.

⁹ ЭЗЭН, авраач! Бидний дуудах өдөр Хаан бидэнд хариулах болтугай!