Дуулал 146 - Ариун Библи 2013

Бурханы ач тусыг магтагтун!

¹ ЭЗЭНийг магтагтун! Сэтгэл минь ээ, ЭЗЭНийг магтагтун!

² Амьддаа ЭЗЭНийг би магтана. Байх зуураа Бурхандаа магтан дуулна.

³ Ноёдод, авралгүй хүний хүүд ч бүү итгэ.

⁴ Сүнс нь гарч явах үед тэд газар шороо уруу буцдаг. Яг тэр өдөр бодлууд нь мөхдөг билээ.

⁵ Иаковын Бурханаар туслуулдаг, Бурхан ЭЗЭНдээ найдагч ерөөлтэй еэ!

⁶ Тэнгэр ба газар, Далай хийгээд түүн дотор байгч бүхнийг бүтээсэн Тэрээр Итгэлийг мөнхөд сахидаг.

⁷ Дарлагдагсдад шударга ёсыг гүйцэлдүүлж, Өлсөгчдөд ч талхыг өгдөг. ЭЗЭН, хоригдлуудыг чөлөөлдөг.

⁸ ЭЗЭН, сохруудад хараа оруулж, ЭЗЭН, сөхрөгсдийг босгодог. Зөвт хүмүүсийг ЭЗЭН хайрладаг.

⁹ ЭЗЭН, ирмэл хүмүүсийг хамгаалж, Эцэггүй болоод бэлэвснийг тэтгэдэг, Харин гэм буруутнуудын замыг тахирлуулдаг.

¹⁰ Сион оо, Бурхан ЭЗЭН чинь Үеэс үед, мөнхөд захирна. ЭЗЭНийг магтагтун!