Дуулал 142 - Ариун Библи 2013

Хавчигсдаас ангижрахуйн төлөө залбирал

Давидын маскил. Агуйд байх үеийнх нь залбирал.

¹ Дуу хоолойгоороо ЭЗЭНд чангаар хашхирлаа, би Дуу хоолойгоороо ЭЗЭНээс гуйлаа, би.

² Түүний өмнө гомдолоо уудалж, Зовлон шаналангаа Түүний өмнө ярилаа, би.

³ Сүнс минь миний дотор сульдахад Зам мөрийг минь Та мэдэж байжээ. Явах тэр замд минь Надад тэд урхи нуусан байжээ.

⁴ Баруун тал уруу би харж ажиглалаа. Намайг тоох хэн ч алга. Надад хоргодох газар ч үлдсэнгүй. Сэтгэлийг минь эрэлхийлэгч нэг ч үгүй.

⁵ Аяа ЭЗЭН, би Танд хашхирч, хэлэхдээ “Миний хоргодох газар, Амьдын нутагт миний хувь Та юм.

⁶ Хашхирах дууг минь анхааран сонсооч. Учир нь би маш дорд болгогджээ. Миний хувьд тэд хэт хүчтэй тул Намайг мөшгөгчдөөс минь авраач!

⁷ Сэтгэлийг минь шоронгоос гаргаач! Би Таны нэрд талархал өргөе. Та надад өгөөмөр хандах учир Зөвтүүд намайг хүрээлнэ” гэсэн.