Дуулал 141 - Ариун Библи 2013

Муугаас сэрэмжлэхүйн залбирал

Давидын дуулал.

¹ Аяа ЭЗЭН, би Таныг дуудаж байна. Над уруу хурдан ирээч! Таныг би дуудаж байх үед Дуу хоолойд минь чих тавиач!

² Залбирал минь Таны өмнө утлага адил тавигдаг. Гараа өргөх минь үдшийн тахил адил байг.

³ Аяа ЭЗЭН, аманд минь манаач тавьж, Уруулын минь хаалгыг хамгаалаач!

⁴ Ёс бусыг үйлдэгч хүмүүсийн хамт Гэмт буруу үйлсийг үйлдэхээр Аливаа ёрын зүйлсэд Зүрхийг минь бүү эргүүлээч! Тэдний амттануудаас надад бүү идүүлээч!

⁵ Зөвт нэгэн намайг цохиг. Тэр нь хайр энэрэл билээ. Намайг зэмлэг. Тэр нь шилмэл тос билээ. Толгойг минь үүнээс бүү татгалзуулаач! Учир нь залбирал минь Тэдний ёрын муугийн эсрэг юм.

⁶ Шүүгчид нь хадны хажуу уруу шидэгдэхдээ Миний үг амттай учраас Тэд түүнийг сонсох болно.

⁷ Хэн нэгэн нь газар хөрсийг хагалж, борнойдох адил Яснууд маань Үхэгсдийн орны хаалган дээр тараагджээ.

⁸ Аяа БУРХАН Эзэн, Нүд минь Тан уруу чиглэнэ. Тан дотор би хоргодно. Сэтгэлийг минь хамгаалалтгүй бүү орхиоч.

⁹ Надад тавьсан урхи торноос нь Мөн ёс бусыг үйлдэгчдийн занганаас намайг хамгаалаач!

¹⁰ Намайг өнгөрөн одтол Буруутыг өөрийнх нь торонд унагаач!