Дуулал 113 - Ариун Библи 2013

Гачигдагсдад туслагч Бурхан

¹ ЭЗЭНийг магтагтун! ЭЗЭНий зарц нар аа, магтагтун, ЭЗЭНий нэрийг магтагтун.

² Эдүгээгээс өнө мөнх хүртэл ЭЗЭНий нэр магтагдах болтугай.

³ Нар мандахаас жаргах хүртэл ЭЗЭНий нэр магтагдах болтугай.

⁴ ЭЗЭН бүх үндэстний дээгүүр өргөмжлөгдсөн бөгөөд Алдар нь тэнгэрсийн дээгүүр болой.

⁵ Бурхан ЭЗЭНтэй маань Хэн нь адил өндөрт заларч,

⁶ Тэнгэр газар дээрхийг үзэхээр Хэн бөхийдөг вэ?

⁷ Тэрээр ядуусыг шорооноос өргөж, Гачигдагсдыг үнсэн овооноос өндийлгөдөг нь

⁸ Ноёдтой хамт, Ард түмнийхээ ноёдтой хамт суулгахын тулд болой.

⁹ Хүүсэр эмэгтэйг Хүүхдүүдийн жаргалт эх болгон Тэрээр гэрт нь амьдруулдаг билээ. ЭЗЭНийг магтагтун!