Дуулал 112 - Ариун Библи 2013

Зөвтийн ерөөл

¹ ЭЗЭНийг магтагтун! ЭЗЭНээс эмээдэг, Тушаалуудад нь ихэд баярладаг хүн Юутай ерөөлтэй!

² Үр удам нь дэлхий дээр хүчтэй болно. Чигч шударгын хойч үеийнхэн ерөөгдөнө.

³ Гэрт нь хөрөнгө баялгууд байна. Зөвт байдал нь мөнхөд тогтоно.

⁴ Нигүүлсэнгүй, өрөвч, зөвт Чигч шударга хүмүүсийн төлөө Харанхуйд гэрэл цацарна.

⁵ Нигүүлсэнгүй бөгөөд зээлдүүлдэг хүн сайн байна. Тэрээр шүүхэд хэргээ батлах болно.

⁶ Тэрээр хэзээ ч ганхахгүй. Зөвт хүн мөнхөд дурсагдах болно.

⁷ Тэрээр муу мэдээнээс айхгүй. ЭЗЭНд итгэн түүний зүрх бат болой.

⁸ Зүрх нь гуйвшгүй. Тэрээр өстнүүдээ харахдаа ч хүртэл айхгүй.

⁹ Тэрээр тараасан, ядууст өгсөн бөгөөд Түүний зөвт байдал мөнхөд байна. Түүний эвэр хүндэтгэлтэйгээр өргөмжлөгдөнө.

¹⁰ Гэм буруутан хараад унтууцна. Тэрээр шүдээ хавиран устаж үгүй болно. Гэм буруутнуудын шунал тийнхүү сөнөнө.