Дуулал 101 - Ариун Библи 2013

Шударга ёсыг хүсэмжлэхүй

Давидын дуулал.

¹ Хайр энэрэл ба үнэний тухай би дуулна, Аяа ЭЗЭН Танд би магтан дуулна.

² Би гэм зэмгүйн замаар явна. Та над уруу хэзээ ирэх вэ? Би гэр дотроо үнэнч сэтгэлээр явах болно.

³ Би нүднийхээ өмнө Үл бүтэх ямар ч юмыг байлгахгүй. Би урвагчдын ажлыг үзэн яддаг. Тэр нь надад наалдахгүй.

⁴ Зальхай зүрх надаас дайжин Ёрын мууг би мэдэхгүй болно.

⁵ Хөршөө сэмхэн муулагчдыг би устгана. Дээгүүр харц, бардам сэтгэлтэй хэнийг ч би тэвчихгүй.

⁶ Өөртэйгөө хамт суулгахаар Нүд минь энэ нутгийн үнэнч хүмүүсийг ажиглана. Гэм зэмгүй замаар явагч нь Надад үйлчилж болно.

⁷ Хууран мэхлэгч нэгэн Гэрт минь эс сууна. Худал яригч нь Хараанд минь үл тогтоно.

⁸ Ёс бусыг үйлдэгч бүхнийг ЭЗЭНий хотоос таслахын тулд Өглөө бүр би энэ газар нутгийн Бүх буруутыг устгана.