Дэд хууль 6 - Ариун Библи 2013

Агуу тушаал

¹ Иорданыг гатлан очоод, эзэмших газар нутаг дээрээ та нарын дагаж мөрдөх тушаал, зарлиг, шийдвэрүүд энэ бөгөөд үүнийг та нарт зааж сургахыг ЭЗЭН Бурхан чинь надад тушаасан юм.

² Ингэснээр чи болон чиний хүү, хүүгийн чинь хүү амьдралынхаа бүхий л өдрүүдэд ЭЗЭН Бурханаасаа эмээх бөгөөд миний та нарт тушаах бүх зарлиг, тушаалуудыг нь даган мөрд, тэгвэл чи урт наслах юм.

³ Израиль аа, одоо сонс! Та нар үүнийг сахин мөрдөхдөө хичээнгүй бай! Тэгвэл чи сайн сайхан явж, эцэг өвгөдийн чинь Бурхан ЭЗЭНий чамд амласанчлан чи сүү зөгийн балаар бялхсан тэр газар нутаг дээр улам өнөр өтгөн болно.

⁴ Сонс, Израиль аа! ЭЗЭН бол бидний Бурхан бөгөөд ганц ЭЗЭН.

⁵ Чи Бурхан ЭЗЭНээ бүх зүрх, бүх сэтгэл, бүх хүч чадлаараа хайрла.

⁶ Өнөөдөр чамд миний тушааж буй энэ үгсийг чи зүрхэндээ байлгаж,

⁷ хөвгүүдээ үүгээр хурцлан, гэртээ сууж байхдаа ч, замд явж байхдаа ч, хэвтэж байхдаа ч, өндийн босохдоо ч түүний тухай ярьж бай.

⁸ Чи түүнийг тэмдэг болгон гартаа уяж, хоёр нүднийхээ хооронд сахиус мэт байлга.

⁹ Мөн түүнийг гэрийнхээ хатавчин дээр ч, хаалган дээр ч бич.

Дуулгаваргүйн эсрэг сэрэмжлүүлгэ

¹⁰ ЭЗЭН Бурхан чинь чамд өгөхөөр чиний эцэг өвгөд Абрахам, Исаак, Иаковт тангарагласан тэр газарт чамайг аваачиж, өөрсдийн чинь барьж босгоогүй том сайхан хотууд,

¹¹ чиний дүүргээгүй сайн сайхан юмсаар дүүрэн гэрүүд, чиний ухаагүй усан сан, чиний тарьж ургуулаагүй усан үзмийн цэцэрлэг, чидун жимсний моддыг чамд өгч, чамайг цадтал идүүлэх үед

¹² чи өөрийгөө хичээ. Чамайг боолчлолын гэрээс, Египетийн газар нутгаас авчирсан ЭЗЭНийг чи мартуузай.

¹³ Чи Бурхан ЭЗЭНээсээ эмээн, зөвхөн Түүнд үйлчилж, Түүний нэрээр тангарагла.

¹⁴ Та нар бусад бурхдыг буюу эргэн тойрныхоо ард түмний бурхдаас алийг нь ч бүү дага.

¹⁵ Та нарын дунд байгаа ЭЗЭН Бурхан чинь хартай Бурхан учир ЭЗЭН Бурхан чинь та нарт уурлан хилэгнэж, газрын хөрснөөс та нарыг арчин зайлуулуузай.

¹⁶ Та нар Массад сорьсон шигээ, Бурхан ЭЗЭНээ бүү сорь.

¹⁷ ЭЗЭН Бурханыхаа та нарт тушаасан тушаал, гэрчлэл, зарлигуудыг та нар сахисан шиг сахь.

¹⁸ ЭЗЭНий мэлмийд юу нь зөв зүйтэй, сайн болохыг үйлд. Тэгвэл чи сайн сайхан байж, чиний эцэг өвгөдөд ЭЗЭНий тангарагласан тэр сайхан газар нутагт чи очиж эзлэн,

¹⁹ ЭЗЭНий айлдсанчлан, хамаг дайснаа өмнөөсөө хөөж гаргана.

²⁰ Хожим чиний хүү “Бидний Бурхан ЭЗЭНий та нарт тушаасан гэрчлэл, зарлиг, шийдвэрүүд юу юм бэ?” гэж чамаас асуувал

²¹ чи хүүдээ “Бид Египетэд Фараоны боол байсан юм. ЭЗЭН хүчирхэг мутраараа биднийг Египетээс авчирсан.

²² ЭЗЭН, бидний нүдний өмнө агуу их аймшигт тэмдгүүд, гайхамшгуудыг Египетэд, Фараонд, түүний хамаг гэр оронд үзүүлсэн юм.

²³ Тэр бидний эцэг өвгөдөд тангарагласан нутагтаа биднийг оруулж, бидэнд өгөхийн тулд тэндээс авчирсан билээ” гэж хэл.

²⁴ Биднийг өнөөдрийнх шиг амьд байлгахын тулд, үргэлжийн сайн сайхны маань төлөө ЭЗЭН энэ бүх зарлигийг дагахыг мөн Бурхан ЭЗЭНээсээ эмээхийг бидэнд тушаасан билээ.

²⁵ Бид Түүний тушаасан ёсоор Бурхан ЭЗЭНийхээ өмнө энэ бүх тушаалыг дагахдаа хянуур байх аваас тэр нь бидний зөвт байдал болно.