2Шастир 17 - Ариун Библи 2013

Иехошафатын хаанчлал

¹ Түүний хүү Иехошафат оронд нь хаан болоод, Израилийн эсрэг өөрийгөө хүчтэй илэрхийлэв.

² Тэрээр Иудагийн бүх бэхлэгдсэн хотод цэргийн хүчин тавьж, эцэг Асагийнхаа эзлэн авсан Иудагийн газарт болон Ефраимын хотуудад цэргийн ангиудыг байрлуулжээ.

³ ЭЗЭН, Иехошафаттай хамт байлаа. Учир нь тэрээр эцэг өвөг Давидынхаа эртний замыг дагаж, улмаар Баалуудыг эрэлхийлэлгүй

⁴ харин эцгийнхээ Бурханыг эрэлхийлэн, Түүний тушаалуудыг дагасан бөгөөд Израилийн адил үйлдээгүй юм.

⁵ Иймээс ЭЗЭН хаанчлалыг түүний гарт бататгаж, бүх Иуда Иехошафатад алба гувчуур авчирсанд тэрээр үлэмж баялагтай, нэр хүндтэй болов.

⁶ Түүний зүрх ЭЗЭНий замуудад зоригжиж, тэрээр Иудагаас мөргөлийн өндөрлөгүүд болон Ашерагийн модон шонг зайлуулсан юм.

⁷ Тэгээд хаанчлалынхаа гуравдугаар онд тэрээр Иудагийн хотуудад заан сургахаар өөрийн түшмэд болох Бен-хаил, Обадиа, Зехариа, Нетанел, Микаиа нарыг илгээв.

⁸ Мөн тэдний хамт левичүүдийг буюу Шемаиа, Нетаниа, Зебадиа, Асахел, Шемирамот, Иехонатан, Адониа, Тобиа, Тобадониа гэх левичүүдийг мөн тэдний хамт тахилч Елишама, Иехорам нарыг явуулав.

⁹ Тэд ЭЗЭНий хуулийн номыг өөртөө авч Иудад заан, Иудагийн бүх хотоор явж, ард түмнийг сургав.

¹⁰ Иудагийн эргэн тойрон дахь бүх газрын хаанчлал дээр ЭЗЭНээс эмээхүй байсан бөгөөд тэд Иехошафатын эсрэг дайтсангүй.

¹¹ Филистчүүдээс Иехошафатад бэлэг сэлт болон алба гувчуурт мөнгө авчрав. Мөн арабууд түүнд долоон мянга долоон зуун хуц, долоон мянга долоон зуун ухнатай сүрэг авч иржээ.

¹² Иехошафат улам өргөмжлөгдөж, Иудад бэхлэлт цайз болон нөөц хангамжийн хотуудыг барьж байгуулав.

¹³ Иудагийн хотуудад маш их хангамж мөн Иерусалимд дайчид ба эрэлхэг хүчит эрс түүнд байлаа.

¹⁴ Эцгүүдийнх нь бүлийн дагуух тэдний жагсаалт ийм болой. Иудагийн мянгатын дарга нараас, жанжин Адна болон түүнтэй хамт гурван зуун мянган эрэлхэг дайчин,

¹⁵ түүний дараах нь жанжин Иехоханан болон түүнтэй хамт хоёр зуун наян мянган дайчин,

¹⁶ түүний дараах нь ЭЗЭНд өөрийгөө зориулсан, Зихрийн хүү Амасиа болон түүнтэй хамт хоёр зуун мянган эрэлхэг дайчин байв.

¹⁷ Бениаминаас, эрэлхэг хүчит эр Елиада болон түүнтэй хамт нум, бамбайгаар зэвсэглэсэн хоёр зуун мянган дайчин,

¹⁸ түүний дараах нь Иехозабад болон түүнтэй хамт дайнд зэвсэглэсэн зуун наян мянган дайчин байв.

¹⁹ Эдгээр нь хааны үйлчлэлд байснаас гадна Иуда даяарх бэхлэгдсэн хотуудад хааны байрлуулсан хүмүүс юм.