2Хаад 15 - Ариун Библи 2013

Иудаг Азариа хаанчлав

¹ Израилийн хаан Иеробоамын хорин долдугаар онд Иудагийн хаан Амазиагийн хүү Азариа хаан болжээ.

² Хаан болохдоо тэр арван зургаан настай байсан бөгөөд Иерусалимд тавин хоёр жил хаанчилжээ. Түүний эхийг Иерусалимын Иеколиа гэдэг байв.

³ Тэрээр эцэг Амазиагийнхаа хийсэн бүгдийг дуурайн ЭЗЭНий мэлмийд зөв зүйтэйг үйлдэв.

⁴ Зөвхөн мөргөлийн өндөрлөгүүдийг зайлуулсангүй. Ард түмэн мөргөлийн өндөрлөгүүд дээр тахилгалж, утлага уугиулсаар байв.

⁵ Хааныг ЭЗЭН цохисон бөгөөд үхэх өдрөө хүртэл тэр уяман өвчтэй байж, тусдаа өргөөнд амьдарчээ. Хааны хүү Иотам, хааны гэрийг захиран улс орныхоо хүмүүсийг шүүв.

⁶ Азариагийн бусад үйл хэрэг болон түүний хийсэн бүхэн нь Иудагийн Хаадын шастир номд бичигдсэн бус уу?

⁷ Азариа эцэг өвгөдийнхөө хамт нойрссон бөгөөд түүнийг эцэг өвгөдийнх нь хамт Давидын хотод нутаглуулсан юм. Түүний хүү Иотам оронд нь хаан болов.

Израилийг Зехариа хаанчлав

⁸ Иудагийн хаан Азариагийн гучин наймдугаар онд Иеробоамын хүү Зехариа Израилийн хаан болж Самарид зургаан сар захирав.

⁹ Эцэг өвгөдийнхөө үйлдсэний адил тэрээр ЭЗЭНий мэлмийд ёрын мууг үйлдсэн бөгөөд Израилиар нүгэл үйлдүүлсэн Небатын хүү Иеробоамын нүглүүдээс салсангүй.

¹⁰ Тэгтэл Иабешийн хүү Шаллум түүний эсрэг хуйвалдаж, ард түмний өмнө түүнийг цохин алж, түүний сууринд хаанчлав.

¹¹ Зехариагийн бусад үйлс, харагтун, тэд Израилийн Хаадын шастир номд бичигдсэн билээ.

¹² Иехүд хандан “Чиний дөрвөн үеийн хөвгүүд Израилийн хаан сэнтийд заларна” гэж айлдсан ЭЗЭНий үг энэ бөгөөд тийнхүү биелэгджээ.

Израилийг Шаллум хаанчлав

¹³ Иабешийн хүү Шаллум, Иудагийн хаан Уззиагийн гучин есдүгээр онд хаан болж, Самарид нэг сар хаанчлав.

¹⁴ Тэгтэл Гадигийн хүү Менахем Тирзагаас хөдлөн Самарид ирж, Иабешийн хүү Шаллумыг Самарид цохин алж, түүний оронд хаан болов.

¹⁵ Шаллумын бусад үйлс болон түүний зохиосон хуйвалдаан зэрэг нь, харагтун, Израилийн Хаадын шастир номд бичигдсэн юм.

¹⁶ Тэр үед хотын хаалгыг нээж өгөөгүйгээс болж Менахем Тирзагаас авахуулан Тифсаг буюу түүн дотор болон хил хязгаарт нь байсан бүх хүнийг цохиж, бүх жирэмсэн эмэгтэйчүүдийг нь сийчжээ.

Израилийг Менахем хаанчлав

¹⁷ Иудагийн хаан Азариагийн гучин есдүгээр онд Гадигийн хүү Менахем Израилийн хаан болж, Самарид арван жил хаанчлав.

¹⁸ Тэрээр ЭЗЭНий мэлмийд ёрын мууг үйлдсэн бөгөөд Израилиар нүгэл үйлдүүлсэн Небатын хүү Иеробоамын нүглээс бүх өдрүүдийнхээ туршид салсангүй.

¹⁹ Ассирийн хаан Пул тэр нутагт ирсэн бөгөөд Менахем түүнд мянган талант мөнгө өгөв. Ингэсэн нь хаанчлалыг гартаа батжуулахад нь Пулын гар түүнийг дэмжиж магад гэснийх байлаа.

²⁰ Ассирийн хаанд төлөх гэж Израилиас буюу баян чинээлэг хүмүүсээс, хүн тусбүрээс тавин шекел мөнгийг Менахем гаргуулжээ. Тиймээс Ассирийн хаан тэр нутагт үлдэлгүй буцжээ.

²¹ Менахемын бусад үйлс болон түүний хийсэн бүхэн Израилийн Хаадын шастир номд бичигдсэн бус уу?

²² Менахем эцэг өвгөдийнхөө хамт нойрссон бөгөөд түүний хүү Пекахиа оронд нь хаан болов.

Израилийг Пекахиа хаанчлав

²³ Иудагийн хаан Азариагийн тавьдугаар онд Менахемын хүү Пекахиа Самарид Израилийн хаан болж, хоёр жил захирав.

²⁴ Тэрээр ЭЗЭНий мэлмийд ёрын мууг үйлдсэн бөгөөд Израилиар нүгэл үйлдүүлсэн Небатын хүү Иеробоамын нүглүүдээс салсангүй.

²⁵ Тэгтэл түүний түшмэл Ремалиагийн хүү Пека түүний эсрэг хуйвалдаж, Аргоб, Арие нар болон гилеадчуудаас тавин эрийн хамт түүнийг Самарид, хааны өргөөний шилтгээнд цохив. Тэрээр түүнийг алж оронд нь хаан болов.

²⁶ Пекахиагийн бусад үйлс болон түүний хийсэн бүхэн нь, харагтун, Израилийн Хаадын шастир номд бичигдсэн юм.

Израилийг Пека хаанчлав

²⁷ Иудагийн хаан Азариагийн тавин хоёрдугаар онд Ремалиагийн хүү Пека Самарид Израилийн хаан болж, хорин жил хаанчлав.

²⁸ Тэрээр ЭЗЭНий мэлмийд ёрын мууг үйлдсэн бөгөөд Израилиар нүгэл үйлдүүлсэн Небатын хүү Иеробоамын нүглүүдээс салсангүй.

²⁹ Израилийн хаан Пекагийн өдрүүдэд Ассирийн хаан Тиглат-пилесер ирж, Нафталийн бүх газар нутаг буюу Ион, Абел-бет-маака, Ианоа, Кедеш, Хазор, Гилеад болон Галилийг эзлэн авч, тэднийг Ассири уруу олзлон авч явжээ.

³⁰ Тэгтэл Елагийн хүү Хошеа, Ремалиагийн хүү Пекагийн эсрэг хуйвалдаан зохиож, түүнийг цохиж алаад, Уззиагийн хүү Иотамын хорьдугаар онд түүний сууринд хаан болов.

³¹ Пекагийн бусад үйл хэрэг болон түүний хийсэн бүхэн нь, харагтун, Израилийн Хаадын шастир номд бичигдсэн юм.

Иудаг Иотам хаанчлав

³² Израилийн хаан Ремалиагийн хүү Пекагийн хоёрдугаар онд Иудагийн хаан Уззиагийн хүү Иотам хаан болов.

³³ Тэрээр хаан болохдоо хорин таван настай байсан бөгөөд Иерусалимд арван зургаан жил хаанчилсан юм. Түүний эхийг Задокийн охин Иеруша гэдэг байв.

³⁴ Тэрээр өөрийн эцэг Уззиагийн хийсэн бүгдийг дуурайн ЭЗЭНий мэлмийд зөв зүйтэйг үйлдэв.

³⁵ Зөвхөн мөргөлийн өндөрлөгүүд зайлуулагдаагүй бөгөөд ард түмэн мөргөлийн өндөрлөгүүд дээр тахил тахиж, утлага уугиулсаар байв. Иотам ЭЗЭНий өргөөний дээд хаалгыг босгосон юм.

³⁶ Иотамын бусад үйл хэрэг болон түүний хийсэн бүхэн нь Иудагийн Хаадын шастир номд бичигдсэн бус уу?

³⁷ Тэр өдрүүдэд Иудагийн эсрэг Арамын хаан Резин болон Ремалиагийн хүү Пека нарыг ЭЗЭН илгээж эхлэв.

³⁸ Иотам эцэг өвгөдийнхөө хамт нойрсож, өвөг эцэг Давидынхаа хотод эцэг өвгөдийнхөө хамт тавигдав. Хүү Ахаз нь түүний оронд хаан болов.